Iz prīšku latgaliskais raidejums “Kolnasāta” skanēs nu Rēzeknis

Iz prīšku latgaliskais raidejums “Kolnasāta” skanēs nu Rēzeknis

Ar 2017. godu byutiskys puormainis pīdzeivoj Latvejis Radejis latgaliskais raidejums “Kolnasāta”, iz prīšku tū veiduos Latvejis Radejis Latgolys multimedeju studejā i tam byus jauns vadeituojs – muzikis Ēriks Zeps.

Jau itymā sastdīnē, 7. janvarī, Latvejis Radejis 1 eterā izskanēs pyrmais ituo goda “Kolnasātys” raidejums, kas piļneibā veiduots Latgolā, Latvejis Radejis Latgolys multimedeju studejā Rēzeknē. Īprīkš raidejums golvonūkuort tyka veiduots Reigā, Latvejis Radejis Dūma laukuma studejā.

Raidejums “Kolnasāta” izskaņ latgalīšu volūdā, pīduovojūt pasavērt iz Latgolu caur interesantim i īdvesmojūšim personeibu stuostim, unikalū volūdys bogoteibu i īsaklauseit latgalīšu redzīņūs.

Leidz ar raidejuma puorsaceļšonu iz Latgolu tam byus ari jauns vadeituojs – Ēriks Zeps, kurs da šam sabīdreibā zynoms kai muzikis. Paraleli tradicionaluos muzykys studejom Ēriks struodoj J. Ivanova Rēzeknis muzykys vydsškolā i dorbojās postfolklorys grupā “Rikši”. Planavuots, ka ik pa laikam “Kolnasātys” klauseituojim byus vareiba satikt ari leidzšinejū raidejuma vadeituoju Aigaru Runči. Iz prīšku “Kolnasātai” byus ari jauna producente, raidejumu veiduos Vineta Vilcāne. Vineta īprīkš vadejuse latgalīšu kulturys ziņu portalu lakuga.lv i struoduojuse VSIA “Latvijas Vēstnesis” par nūzaru korespondenti vītnē lvportals.lv.

7. janvara raidejumā “Kolnasāta” gostūs aicynuojuse Ingaru Gusānu, kas muzykys pasaulī pazeistams kai Sovvaļnīks. Jam tikkū izguojs jauns albums “Napaseitynuouts”, sarunā ar Ingaru par jaunū albumu, dzīšmu radeišonu latgaliski i tū, voi teišom muzikis nuokūtnē planavoj pīsavērst šlagerim. Sižetā no Daugovpiļs īsavērsim kaidā naseņ izguojušā gruomotā par šmakovkys viesturi Latgolā.

Kai īrosts, raidejums Latvejis Radejis 1 eterā skanēs sastdīņu vokorūs 18:15 stuņdēs, tuo īrokstus var klauseitīs ari radejis sātys lopā. Bet “Kolnasātys” jaunumim var leidza sekuot vītnē facebook.com.

Print Friendly, PDF & Email

Komentari