Latgolys radejā izskanēs raidejums par Latgolys viesturi 20. gs. 40. g.

LaKuGa 11. Janvars, 2017. gods Comments Off on Latgolys radejā izskanēs raidejums par Latgolys viesturi 20. gs. 40. g.
Latgolys radejā izskanēs raidejums par Latgolys viesturi 20. gs. 40. g.

Catūrtdiņ, 12. janvarī, Latgolys radejā skanēs viesturneicys Elīnys Kalnenis vadeitais raidejums, kurymā Rūmys Katuoļu bazneicys Rēzeknis – Aglyunys diecezis veiskups Juoņs Buļs i Latvejis Okupacejis muzeja viesturneica Inese Dreimane runuos par gareigumu, gareidznīceibu i okupacejis varu Latgolā pagājušuo godu symta 40. godūs, informej Okupacejis muzeja puorstuovi.

Raidejumu varēs dzierdēt catūrtdiņ 11.00 i 16.00 ar atkuortuojumu sastdiņ 11.00. Tīšraidi varēs klauseitīs ari škārsteiklā iradio.lv.

Elīna Kalniņa par radejis raidejumu veiduošonys īmeslim soka: “Voi apsazynojam, ka padūmu okupacejis perioda nūspīdumi myusu prīškteču i leidzcylvāku pīredzēs ir nūzeimeigi sevkuram nu myusu, kas dzeivoj tānejā Latvejā i gryb veiduot Latvejis reitdīnu? 40. godi beja lyuzuma pūsmys. Tys nu individa praseja cīši daudz. Sevkurs ogruok voi vāluok datyka vys jaunu, sarežgeitu izvieļu prīškā: pījimt voi nūlīgt; sasamīrynuot voi riskēt; ceineitīs voi pasadūt. Daguoja revidēt sevi, puorviertēt vierteibys i vuiceitīs jaunys pošsaglobuošonuos i izdzeivuošonys prasmis, kuruos tyka nūdūtys tuoļuok bārnim. Grybom voi nā, nu mes vacvacuoku i vacuoku saprostū i īvuiceitū nasam sevī vys vēļ. Latgalīši var lepuotīs ar Latvejai cīši nūzeimeigim, unikalim paguotnis pīredzis stuostim, partū ka taišni Latgolā pretuošonuos it eipaši ūtrajai padūmu okupacejai beja cīši daudzveideiga, spūdra i stypra. 40. godu viesturei veļteitī radejis raidejumi Latgolys radejā izgaismuos nūtikšonys i ļaus īpazeit cylvākus, kurūs pīredze ir myusu nacionalais duorgums i pīmiņa – svāts montuojums.”

12. janvarī dzieržamuo saruna ir pyrmuo 20. godu symta četrdasmytūs godu Latgolys viesturei veļteitūs treis raidejumu cyklā “Mūsu pagātne līdzās: spēka avots vai skelets skapī”. Nuokušuos sarunys ar nedelis intervalu nūtiks janvara catūrtdīnēs: 19. i 26. janvarī 11.00 ar atkuortuojumu 16.00 i sastdīnēs 11.00.

19. janvarī nūvodpietnīks bolvuonīts Zigfrids Berkis i Latvejis Universitatis Viesturis instituta pietnīks Zigmārs Turčinskis runuos par latgalīšu pretesteibu padūmu okupacejai Zīmeļlatgolā, nu 26. janvarī — viesturnīks Juoņs Viļums i dokumentaluos kinys “Segvārds Vientulis” režisors Normunds Pucis par pretesteibu padūmu varai Dīnvydlatgolā.

Piec raidejumu izskaniešonys tī byus atrūnami ari Latvejis Okupacejis muzeja YouTube kanalā.

Raidejumus veidoj Latvejis Okupacejis muzejs, kas leidzdarbeibys leigumā ar Kulturys ministreju ir apsajiems reikuot pasuokumus, kurī veicynoj socialuos atminis i Latvejis viesturis izpieti Latvejis regionūs.

Komentari slāgti.