Zynomi rezultati konkursūs par radejis i TV raidejumu veiduošonu Latgolā

LaKuGa 13. Janvars, 2017. gods Comments Off on Zynomi rezultati konkursūs par radejis i TV raidejumu veiduošonu Latgolā
Zynomi rezultati konkursūs par radejis i TV raidejumu veiduošonu Latgolā

Nacionaluo elektroniskūs plošsazinis leidzekļu padūme (NEPLP) apstyprynuojuse konkursu rezultatus par raidejumu veiduošonu 2017. godā Latgolys regionalajūs i vītejūs plošsazinis leidzekļūs, kas raida televizejis i radejis programys, viestej informaceja NEPLP sātyslopā. Konkursā par radejis programys veiduošonu uzvarēja producentu grupys SIA “Lietišķā Latgale“ pīduovuojums, nu konkursā par TV programu veiduošonu – naatkareiguos producentu grupys SIA “Studija 3KM” pīduovuojums.

Kotra konkursa finansiejums ir 35 571 eiro. Sabīdryskais pasyutejums paradzāts regionalajim i vītejim elektroniskajim plošsazinis leidzeklim i producentu grupom Latgolys regionā.

“Studija 3KM” konkursā pīduovuoja veiduot 12 izgleitojūšus raidejumus cyklā “Sajūti Latgali” (kotru – 27 minutu garumā), kas da goda beigu byus radzami Latvejis televizejā, Re:TV, Vydsdaugovys televizejā i škārsteiklā. Raidejumūs planavuots paruodeit taidys temys: sabīdriski aktualys nūtikšonys Latgolā, uzjiemieju veiksmis stuosti, socialī vaicuojumi, doba i vide, izgleiteiba i cyti. Raidejumu cykla mierkis ir veicynuot sabīdreibys cīšumu i styprynuot vaļsts volūdys pozicejis, kai ari īspiejami plaši informēt par Latgolu i latgalīšim.

Raidejumi “Sajūti Latgali” televizejuos Re:TV, LTV1 i LTV7, kai ari škārsteiklā beja radzami jau 2016. godā.

SIA “Lietišķā Latgale“ pīduovuojums paredz turpynuot veiduot raidejumu cyklu “Pi myusim Latgolā“, kas eterā dzierdams jau nu 2012. goda beigu. SIA “Lietišķā Latgale“ pīduovoj veiduot div raidejumus nedeļā ar kūpejū originalsatura garumu 35 minuti (20 minutu i 15 minutu raidejumi) latvīšu i latgalīšu volūduos. Kūpā itūgod sabīdryskuo pasyutejuma ītvorūs planavuots izveiduot 88 raidejumus par kulturu, kulturviesturi i viesturi, kai ari par sabīdriski politiskom temom. Eipašu viereibu itūgod dūmuots veļteit 1917. goda Latgolys latvīšu kongresa nūtikšonom, tuo lāmumu analizei tūpūšuos Latvejis kontekstā, kai ari pošvaļdeibu vieliešonom.

Raidejumi dzierdami Latgolys Radejā, radejā “Ef-Ei“ i Div Krostu radejā, kai ari Radejā Marija. Raidejums sasnādz ari škārsteikla auditoreju, izmontojūt portalus LaKuGa.lv, Latgale.lv, Pimyusimlatgola.lv i cytus. 

Obeju pīmynātūs konkursu mierkis ir sabīdreibys cīšuma, nacionaluos identitatis i vaļsts volūdys pozicejis nūstyprynuošonys pasuokumu eistynuošona, kab panuoktu Latvejis identitatis i pīdareibys sajiutys styprynuošonu caur regionaluos i vītejuos identitatis apsazynuošonu i veicynuošonu, itymā procesā īsaistūt Latgolys regiona puorstuovus kai medeju satura veiduotuojus i izplateituojus.

Komentari slāgti.