Guntrys “Buorstuos” – 2016. goda sastuo vierteiguokuo dzīsme

LaKuGa 22. Janvars, 2017. gods Comments Off on Guntrys “Buorstuos” – 2016. goda sastuo vierteiguokuo dzīsme

21. janvara vokorā Ventspilī nūtyka Latvejis Radejis 2 pop i roka dzīšmu aptaujis “Muzikālā Banka” nūslāgums. Guntrys Kuzminys izpiļdeituo dzīsme “Buorstuos” klauseituoju i ekspertu bolsuojuma kūpviertejumā sajēme 6. vītu.

Finala koncertā, kuru vadeja akters Kristaps Rasims, klauseituoji varēja dzierdēt 15 lobuokuos dzīsmis, kuruos jau pyrma tuo beja viertējuši i klauseituoji, i muzykys eksperti. Jaunums itūgod beja vareiba skateituojim i klauseituojim bolsuot ari finala laikā. Ekspertu padūmē itūgod beja Boriss Rezniks, Viktors Lapčenoks, Muorteņš Brauns, Uldis Marhilevičs, Juoņs Lūsēns, Juoņs Apeinis, Mārcis Auziņš, Dināra Rudāne, Tālis Gžibovskis, Ozols, Normunds Rutulis, Tuoms Grēviņš.

“Muzikālās Bankas” uzvarātuoju gūdā itūgod tyka grupu “Prāta Vētra” i “Musiqq” izpiļdeituo dzīsme “Debesis iekrita tevī”, ūtrajā vītā – Intars Busulis ar dzīsmi “Miglas rīts”, nu treinīku nūslēdze Dons ar dzīsmi “Tepat”. 

Pādejūs div godūs latgalīšu muzikus Muzykaluos bankys finalā puorstuovēja grupa “Dabasu Durovys”, pyrma tuo vairuokys reizis finalā bejuse ari Guntrys puorstuovātuo grupa “Borowa MC”, kas 2005. godā ari sajāmuse 1. vītu par dzīsmi “Vysskaistuokajai meitinei”.

Karteņa: facebook.com

Komentari slāgti.