Rēzeknē atkluos Jura Brieža grafikys izstuodi

LaKuGa 1. Februars, 2017. gods Comments Off on Rēzeknē atkluos Jura Brieža grafikys izstuodi
Rēzeknē atkluos Jura Brieža grafikys izstuodi

10. februarī 15.00 Latgolys kulturviesturis muzejā (1. stuova izstuožu zalā, Atbreivuošonys alejā 102, Rēzeknē) tiks atkluota Jura Brieža grafikys izstuode “Vara gravīras”, informej muzeja Muokslys nūdalis vadeituoja Inese Dundure. Izstuode byus apsaverama da 11. marta.

Grafikis Jurs Briedis struodoj vīnā nu dorbītiļpeiguokajom i smolkuokajom iespīdgrafikys tehnikom – vara gravirā. Itei tehnika zynoma kai vīna nu senejuokajom dūbspīdis tehnikom. Vuocu renesaņsis laika izcylais muokslinīks Albrehts Dīrers izkūpe gravirys tehniku da piļneibys, juo dorbi vys vēļ ir īdvasmys olūts daudzim myusu dīnu muokslinīkim.

Sovā izstuodē Jurs Briedis pīduovoj skateituojim vara gravirā izpiļdeitūs dorbus, atsaverūt iz padareitū nu 2000. goda. Temu lūkā ir piļsātys – Reiga, Tallina, Sanktpīterburga, Moskova, kai ari Rēzekne, kur akcentāti i izcyluokī itūs piļsātu objekti, i izcalts piļsātys silueta raksturs. Operys i baleta tema, kai ari klasikys dorbu ilustracejis līk apbreinuot autora prasmi paruodeit cylvāka kermiņa skaistumu kusteibā i tālā. Linejis teireiba i fakturu daudzveideiba, kū dūd vara gravira, naatstuoj vīnaļdzeigu i aicynoj izzynuot smolkū estampa viersmu. Autors izlics apsavieršonai ari sovu pyrmū vara gravirys tehnikā radeitū dorbu –komponista Jezupa Vītuola portretu (1983).

Jurs Briedis (1949) struoduojs Latvejis Muokslys akademejis Latgolys filialē (docents), itūšaļt ir Rēzeknis Muokslys i dizaina vydsškolys zeimiešonys školuotuojs. Studējs grafiku na viņ Latvejis Muokslys akademejā Reigā, nu ari I. E. Repina Muokslys Akademejis asistenturā Sanktpīterburgā. Latvejis i uorzemu izstuodēs pīsadola nu 1977. goda, Muokslinīku savīneibys bīdrys nu 1981. goda.

Komentari slāgti.