“Pi myusim Latgolā” gastej Gaļānūs pi Martys Bindukys
Raidejums “Pi myusim Latgolā” gastej Gaļānūs, kur niu dzeivoj i struodoj titula “Latvijas lepnums” sajiemieja Marta Binduka.
Pasasokūt Martys kuņdzei, Gaļānūs niu ir rakstnīkam, filozofam i religeju pietnīkam Robertam Mūkam (eistajā vuordā Robertam Avenam) veļteits muzejs.
Paguojušuo gods golā Marta Binduka sajēme “Latvijas lepnums 2016” bolvu nominacejā “Novadnieks”. Martys kuņdze vys par itū apbolvuojumu runoj cīš pīticeigai, tok atsarūn ļauds, kurī nūviertej juos īguļdejumu bārnu izgleituošonā, Gaļānu pusis viesturis izzynuošonā i Roberta Mūka muzeja veiduošonā i vadeišonā.
Izaruod, ka, suocūt latvīšu volūdys i literaturys školuotuojis dorbu Gaļānu školā, Marta Binduka nimoz nabeja dzierdējuse Roberta Mūka vuordu. Liktiņs tai pasagrīze, ka piec Roberta Mūka atsagrīsšonys nu Amerikys, izadeve jū paaicynuot iz dzejis dīnom Gaļānūs. Tai dzyma sirsneiguo gaļānīšu draudzeiba ar Robertu Avenu i juo sīvu Elzu.
Niu, pasasokūt Martai Bindukai, Roberta Mūka vuords zynoms na viņ juo dzymtajā pusē, nu ari aiz Latgolys rūbežu.
