Bīdreibys “Latgolys Saeima” atkluotuo viestule par Latgolys kongresa symtgadis pīminekļa uzroksta volūdu

LaKuGa 10. Februars, 2017. gods Comments Off on Bīdreibys “Latgolys Saeima” atkluotuo viestule par Latgolys kongresa symtgadis pīminekļa uzroksta volūdu
Bīdreibys “Latgolys Saeima” atkluotuo viestule par Latgolys kongresa symtgadis pīminekļa uzroksta volūdu

Bīdreiba “Latgolys Saeima” ir grīzusēs pi Rēzeknis dūmis prīšksādātuoja, Latgolys kongresa symtgadis pīminekļa autora i kulturys ministris ar atkluotu viestuli par Latgolys kongresa symtgadis pīminekļa uzroksta volūdu.

“Bīdreiba “Latgolys Saeima” izsoka zeimeigys daļys latgalīšu sabīdreibys namīru par veidu, kaidā itūšaļt teik planavuota pīminekļa izveide i aicynoj korekti sakuortuot pīminekļa volūdys vaicuojumu, izavielejūt LATGALĪŠU volūdu par pīminekļa pamatvolūdu.

Sevkuram piļsātys simbolam ir īspiejams īlikt cīši plašu nūzeimu spektru – suocūt nu personiski individualuo, turpynojūt ar piļsātys i nūvoda raksturzeimem, īmūt kūpnacionalā, Eiropys i vyspuorciļvieciskā vierzīnī.

Jums, Bartaševiča kungs, ir privilegeja i atbiļdeiba nūsaceit tū, kaids byus Latgolys kongresa symtgadis pīmineklis. Da šam mes skatejam, ka Jius asat “Latgolys sirds” mērs i īsastuojat par Latgolys vierteibom, tymā skaitā latgalīšu volūdu. Ceram, ka itys puorprotums ar mieginuojumu “izsvīst” latgalīšu volūdu nu pīminekļa tiks atrysynuots, veidojūt pīminekļa uzrokstu latgaliski, i Latgolys sabīdreibai nabyus īmesļu naticēt Jiusu lojalitatei Latgolys regionam. Jums i latgalīšim nivīnam nikas nav juopīruoda – Latgolys lītai tik zeimeigajā pīmineklī juobyut latgalīšu volūdai. Situacejā, kod Jius Latgolys i latgalīšu volūdys vītā dūtu prīškrūku Reigys dīnyskuorteibai, sabīdreibai byutu pamatuotys tīseibys apšaubeit Jiusu vadeibu, vaicojūt – cik vēļ tuoļuok Jius asat gotovs īt, puordūdūt Latgolys i latgalīšu interesis.  

Asara kungs, ar itū vēļreiz vieršam Jiusu uzmaneibu iz pīminis objektu – Latgolys kongresu. Kongresa rezolucejā pījimtuo praseiba saglobuot latgalīšu pašnoteikšonuos tīseibys iz (LATGALĪŠU) volūdu beja rezultats kongresa māranuokuos pusis praseibom. Jiusu pīduovuotais variants ar uzrokstu lejislatvīšu tradicejā ir dryums aplīcynuojums kongresa radikaluokuo spuorna breidynuojumim par tū, ka napuordūmuota, bez pīteikamu juridisku garanteju realizāta asociaceja ar blokusnūvodu tautīšim nūvess pi latgalīšu volūdys izgaisšonys i tautsaimisteibys sabrukuma.  Ideju par kongresa pīminis zeimis uzrokstu na latgalīšu, nu latvīšu volūdā kongresa lūcekli nūteikti skaiteitu kai nirguošonūs i personeigu apvainuojumu. Patīsai tycam, ka Jius varēsit izveiduot pīminis zeimi, napīsmejūt pīmiņu.

Ļ.  cīn. ministris k-dze! Symtgadis svineibu kontekstā Jius vairuokkuort asat pastreipuojuse latgalīšu volūdys nūzeimi Latgolys raksturlinejuos. Situacejā, kod puorprostuo lojalitatis demonstriejuma, napīteikamys sabīdreibys īsaistis voi cytu kuriozu īmesļu deļ latgalīšu volūda var tikt izstumta nu Latgolai byutiska pīminis objekta, lyudzam Jiusu īsaisti i atbolstu latgalīšu volūdai na tik vuordūs, nu ari dorbūs. Naļausim svātkus aptymsuot īspiejamim sabīdreibys protestim pret Kongresa pīminis pīsmīšonu.

Bīdreiba “Latgolys Saeima” kai vīnu nu īspiejamim variantim pīminekļa pamatuzrokstam īsoka Latgolys kongresa rezolucejis suokuma frazi:

 „Mes, Latgolys latvīši…”

Sevkuram cytam variantam ir principials prīšknūsacejums – uzrokstam juobyut latgalīšu volūdā.

Bartaševiča kungs, lyudzu normativajūs aktos paradzātajā kuorteibā informēt Bīdreibu par veidu, kaidā vaicuojums par pīminekļa volūdu ir atrysynojams, naignorejūt latgalīšu interesis i viesturiskū objektivitati.”

Komentari slāgti.