Daugovpilī prezentēs izdavumu “Ebreju Latgola”
17. februarī 15.00 Latgolys Centraluos bibliotekys (LCB) pasuokumu telpā nūtiks Daugovpiļs nūvodpietnīka Josifa Ročko trilingvaluo ceļveža “Ebreju Latgola” prezentaceja, informej bibliotekys puorstuove Tatjana Hodokova. Izdavuma veiduošonu finansiali atbaļsteja Daugovpiļs piļsātys dūme, Latgolys regiona atteisteibys agentura, Vaļsts kulturkapitala fonds, Latvejis vaļsts meži i Daugovpiļs ebreju kūpīna.
Ceļveds “Ebreju Latgale” ir veļteits 100 godim nu Latgolys apsavīnuošonys ar puorejim Latvejis nūvodim. Gruomotā ir ītvarta informaceja latvīšu, latgalīšu i krīvu volūdā par ebrejim i ar ebrejim saisteitom vītom i objektim Latgolys teritorejā, apjemūt dažaidys Latgolys piļsātys – Daugovpili, Īlyuksti, Rēzekni, Ludzu, Kruoslovu, Krystpili, Leivuonu, Varakļuonus, Preiļus i Dagdu. Izdavums pīduovoj pamatinformaciju par kotru objektu, kū papyldynoj fotografejis. Teik snāgts ari viesturiskais konteksts, kas īskicej golvonuos zinis par ebreju apsamesšonu attīceigajā piļsātā, ebreju skaita izmaiņom godu symtu gaitā i davumu piļsātys sabīdriskajā i kulturys dzeivē.
Vysi interesenti teik aicynuoti iz ceļveža “Ebreju Latgale” prezentaceju, kas nūtiks 17. februarī 15.00 LCB pasuokumu telpā. Pasuokuma laikā byus vareiba sasatikt ar gruomotys autoru Josifu Ročko i aizdūt interesejūšus vaicuojumus.
