Īspiejams, vyslatgaliskuokais sporta klubs – “SK Kuorsova”

LaKuGa 21. Februars, 2017. gods Comments Off on Īspiejams, vyslatgaliskuokais sporta klubs – “SK Kuorsova”

Roksta autore: Laura Melne

Kuorsovys nūvoda bīdreiba “SK Kuorsova”, ruodīs, ir vīna nu ratajom Latgolys sporta organizacejom, kas na tikai sevi sauc latgaliskā vuordā, nu ari nasabeist socialajūs teiklūs pamatā komunicēt latgaliski, informejūt par sovim jaunumim i sasnāgumim. Tys ruodejuos eistyn lobs īmeslis, lai nūbrauktu iz Kuorsovu i izzynuotu kū vaira par bīdreibu i aktivajim Kuorsovys nūvoda sportistim. Nu gols golā par volūdu runuojom cīši moz – tei jim ir tik pošsaprūtama līta, ka nasaruod eipašys apsprīsšonys vārta.

“SK Kuorsova” telpys atsarūn nazkodejā Kuorsovys Muzykys i muokslys školā (tuos gon vēļ teik daleitys ar “Kārsavas Namsaimnieku”), kur ari sasatyku ar div bīdreibys puorstuovim: “SK Kuorsova” vaļdis prīšksādātuoju Laimuoni Nagli i, kai pats saceja, īryndys bīdru Tuomu Vuorkali, kurī ari raudzeja īpazeistynuot ar bīdreibys rasšonuos mierkim, jau padareitū i nuokūtnis planim.

“SK Kuorsova” dorbojās jau nadaudz vaira kai treis godus – bīdreiba dybynuota 2013. goda 10. oktobrī, nu dūma par tū, ka vajadzātu veiduot sporta klubu, rodusēs jau puors godu īprīkš Juoņam Kašam. Gols golā, kai smejās Laimuonis, vyss suocīs ar tū, ka jis 2011. godā nūguojs pensejā. Tei bejuse ari loba i gara zīma – kai radeita hokejam. Tuoms dasoka, ka bīdreibys dybynuošona bejuse vajadzeiga, lai izaveiduotu loba platforma, par pīmāru, pasuokumu reikuošonai: “Tī sporta veidi, kas ir bīdreibā, eistineibā pi myusu eksistej jau seņ. Bet agruok hokejistu bareņš kū sovu dareja, volejbolistu bareņš – sovu… Lai jūs apvīnuotu, beja vajadzeiga bīdreiba.” Prūtams, bīdreibys statuss ļuovs vīgļuok dasaisteit ari leidzekļus i nu pošvaļdeibys, i uzjiemieju, kurī redz, ka bīdreibys dorbam ir ari rezultati. Kuorsavīši nasliep, ka pošvaļdeibys finansiejums sportam pādejūs godūs ir pamateigi pīaudzs, dūmūt īspieju pīsadaleit saceņseibuos ari sportistim, kurī bez finansiala atbolsta tū poši navarātu atsaļaut.

Bīdreiba treis godu laikā dubultuojuse bīdru skaitu – niu tamā dorbojās ap 30 bīdru. Tok sevi ar bīdreibu asociēt varūt sevkurs Kuorsovys nūvoda sportists – vysi, kas sportoj zam “SK Kuorsova” vuorda, nav oficiali īsastuojuši bīdreibā. Tys nateikūt uzspīsts, nu bīdrim vaira asūt prīškrūceibu saisteibā ar bīdreibys telpom, kas jim vaira asūt daīmamys, par pīmāru, atpyutai. Tuoms ari pīļaun, ka bīdru skaitu, īspiejams, ītekmej bīdra nauda, kas, prūtams, ir vajadzeiga, lai nūdrūšynuotu finanšu resursus ari nu īkšīnis, – tei godā ir 30 eiro, studentim – iz pusis mozuoka. Taipat nateik nūškierti ari sporta veidi – kai suoka Laimuonis i Tuoms, Kuorsovys nūvods nav tik lels, lai atsaļautu sasadaleit atseviškuos bīdreibuos.

Kotrā sporta veidā, kas Kuorsovys nūvodā eipaši atteisteits, asūt vysmoz vīns entuziasts, ap kurū tys ari atsateistej: “Edgars Urtāns jemās ap zūli, Laimuonis Naglis – hokeju i šautreņom, Mihails Oļipovs – futbolu, Jurs Vuorkaļs – volejbolu.” Tuoms soka, ka jam ruodīs, ka sporta veidu atteisteit bez kaida entuziasta nimoz nav īspiejams. Par pīmāru, taida Kuorsovys nūvodā tryukst basketbolam, kas eipaši nateik atteisteits. Itymā gadīnī taišni cylvāku faktoram ir daudz leluoka nūzeime nakai sporta infrastrukturai – vīns nu aktivuokajim pogostim ir Saļņova, kurā ir tik nalels pamatškolys sporta zals, nu lels entuziasts asūt Jurs Ločmeļs, kuram izadūd paviļkt leidza ari jaunuotni. Tok nūzeimeiga nūtikšona sporta atteisteibai nūteikti ir Kuorsovys stadiona renovaceja, kas pabeigta pārņ rudinī i nūteikti dūs īspiejis eipaši atteisteit vīglatletiku i futbolu. Taipat, kai soka Tuoms, vysu bīdru sapyns nūteikti ir kaidreiz nūvodā sagadeit sporta halli, kuruos nūteikti tryukst. Niu aktivi teik izmontuots Malnovys sporta zals, par kū lelu paļdis bīdreiba soka Malnovys koledžai.

Popularuokī sporta veidi palykuši tī, kas bejuši ari pyrma bīdreibys, tik niu ir lobuok organizāti. Vīneigais, kas pa itim godim daguojs kluotyn, ir teniss. Tys saisteits ar uzlobuotu infrastrukturu – da tuo bejs vīns 70. godūs izveiduotais korts Malnovā, kas vaira nav bejs cīši lobā stuovūklī, nu tod piec bīdru iniciativys pasaruodejuši div jauni laukumi Kuorsovys piļsātys centrā. Niu tymūs vosorā nūteikūt vairuokys saceņseibys.

Kai stuosta Tuoms, “SK Kuorsova” organizej saceņseibys vysūs sporta veidūs, kas bīdreibā teik atteisteiti. Par leluokū i grandiozuokū nūtikšonu varātu saukt strītbola nakti, kas niu jau puorauguse par īlu sporta nakti, pīsaistūt vaira kai symts dalinīku i ari vysmoz iz pusis vaira skateituoju. Vosorā teik organizāts ari pludmalis volejbola čempionats ar vairuokim sabraukumim, zīmā nūteik Pīrūbeža kausa izceiņa volejbolā “Austrumsteiga” i hokeja turniri. Kuorsovīšus vysvaira prīcynoj, ka saceņseibys nav tik vītejā leiminī, nu puļcej ari apleicejūs nūvodu sportistus. “Leluokais nūviertiejums – ka jī nuokušajā godā otkon atbrauc. Tys nūzeimoj, ka jim patyka,” soka Tuoms. Sovukuot Laimuonis dasoka, ka nūzeime varātu byut ari tam, ka vysod teik sagataveitys ari gona lobys bolvys.

Bīdreibā apsavīnuojuši cylvāki, kas pamatā sportoj sovai prīcai, nu tys nanūzeimoj, ka jī sevi asociej tik ar amaterim. Vysaugstuokajā leiminī “SK Kuorsova” bīdri startej šautreņuos aba dartā – janvara vydā nūtykušajā Latvejis čempionatā puoru saceņseibuos Laimuonis Naglis ar sovu puorininīku nu Viļānu ījāmuši 2. vītu. Šautreņuos kuorsavīši apsavīnuojuši ar sportistim nu Viļānim, Jākubpiļs i Guļbinis, partū ka saceņseibuos vajadzeigs nūteikts skaits dalinīku nu kotra kluba, nu Latgolys pusē darts vēļ nav tik cīši populars. Sovukuort divejis Kuorsovys nūvoda futbolistis bejušys īkļautys Latvejis U-17 sīvīšu futbola izlasis sastuovā. Taišni dorbs ar jaunuotni, bārnim teik skaiteits par SK “Kuorsova” golvonū aizdavumu futbola jūmā. Kai soka Tuoms, futbola treners Mihails Olipovs, kurs sovā profesejā teik cīši augstu viertāts ari Latvejis leiminī, jim vuica na tik futbolu, nu dūd daudz ari dzeivei. Vysvaira itymūs godūs atsateistejs varātu byut volejbols – īprīkš, prūtams, ari Kuorsovys nūvodā tys tics spielāts, nu niu, kai soka bīdreibys puorstuovi, videjai paaudzei jau ir samārā lobs leimiņs, kas līk kaļt nuokūtnis planus par īspiejamu spieliešonu Latvejis čempionāta ūtrajā divizejā. Pagaidom komanda spielej Entuziastu volejbola leigā Reigā, kur asūt vīneigī, kas brauc iz saceņseibom nu Latgolys. Taipat ar itū vuiceibu godu ari školā izveiduots volejbola puļceņš. Ari “SK Kuorsova” futbolisti pīsadola saceņseibuos golvyspiļsātā, startejūt Mateja futbola leigā. Futbola komandys sastuovā pamatā ir Reigā dzeivojūši bejušī trenera Mišys audziekni. Taipat sporta klubs atbolsta ari vairuokus individualūs sporta veidu puorstuovus, par pīmāru, pauerliftingā, armrestlingā, šahā.

“SK Kuorsova” sovim bīdrim dūd dīzgon breivys īspiejis atteisteit sovys idejis. Par pīmāru, Martai Ločmelei i Juram Vuorkaļam rodusēs dūma par pruota spēlem. Tai paguojušuo goda beiguos, adventā, treis svātdīnis piec kuortys Kuorsovā nūtyka pruota spēlis “Aļberts”. Gavienī pyrma Leldīņu teik planavuots pasuokumu reikuot otkon. Kuorsavīši soka, ka tys ari ir kuortejais pīruodiejums, ka bīdreibys statuss ļaun daudz vīgļuok pīsaisteit i atbaļsteituojus i veiduot publicitati. Taipat pruota spēlis jī saredz ari kai vītu, kur īsasaista cylvāki, kas kasdīnā ar sportu tradicionalā veidā nanūsadorboj, nu taipat ir ari aktivi cylvāki, kas pīsadola i tī, i tī.

Gols golā teikam ari pi sarunys īmesļa – bīdreibys latgaliskuo nūsaukuma i nasabeišonys komunicēt latgaliski ari socialajūs teiklūs. Soku, ka Kuorsovys nūvodā jau parosti rauga izceļt latgaliskū, iz kū Tuoms iz reizis atsoka, ka izceļt jī nikuo narauga. I es iz reizis saprūtu, ka tai ari ir – muns vaicuojums ir dīzgon glups i itei tema nav pat cīši apsprīsšonys vārta. Jī nikuo naizceļ, nu dreižuok nasabeist poši nu sevis i sovys volūdys. “Ka tu i vysi bīdri kasdīnā runoj latgaliski, treneni nūteik latgaliski, tod byutu jūceigi feisbukā tai naraksteit,” smejās Tuoms. Ari bīdreibys nūsaukums jau nu suokuma ir bejs dūmuots latgaliski. Bejuši vēļ ari cyti varianti (par pīmāru, koč kas saisteibā ar Reitupi), nu beiguos izsprīsts, ka juobyut Kuorsovys vuordam. Vaicuojums tik bejs par raksteibu – bejuse dūma raksteit “SK Kōrsova”, nu Uzjāmumu registrā “ō” lītuot naļuovuši. Laimuoņam desmit minutu laikā beja juoizdūmoj cyts variants, tai nu nūsaukumā pasaruodejs divskaņs “uo”. Tuoms smejās, ka jis par tū tik prīcojās, partū ka “ō” nūsaukumā nagrybātu.

Par nuokūtnis mierkim Laimuonis i Tuoms eipaši nav gotovi stuosteit, sokūt, ka kotram sporta veidam taidi ir kotram sovi. Tok bīdreibys lelais mierkis varātu byut leluoka jaunuotnis pīsaisteišona, na tik pīsadolūt saceņseibuos, nu ari poša kluba dzeivē. Taipat juorauga nūturēt jau asūšūs pasuokumus i audzēt tūs prestižu, partū ka ar puoruok daudzim pasuokumim jau varātu byut gryuši tikt golā, jemūt vārā, ka vysa tūs organiziešona jau nūteik breivpruoteigai.

Kartenis: nu SK “Kuorsova” arhiva

Komentari slāgti.