Izdūta gruomota “Ka dzersi šnabi, moš byus labi!”

LaKuGa 22. Februars, 2017. gods Comments Off on Izdūta gruomota “Ka dzersi šnabi, moš byus labi!”

Latgalīšim labi zynomūs jūku gruomotu “Īdzer veina, lai dzeive ira feina!” (1999) i “Īdzer ols, lai bāduom ira gols!” (2015) cīneituoji sagaidejuši tūs turpynuojumu – gruomotu “Ka dzersi šnabi, moš byus labi!”.

Jaunuos gruomotys autori ir Aizmuorka Berta (Ingrīda Igaune), Cybuļu Jurs, Krapacu Ļuce (Aina Kuorkla) i Zalta Ubags (Imants Zeltiņš). Kotrys autors jūkus pīrakstejs sev atbylstūšajā izlūksnē – Cybuļu Juram tei ir Purlovys izlūksne, Aizmuorka Bertai – Kryšānu izlūksne ar Saļņovys izlūksnis pījaukumu, Krapacu Ļucei – Kryšānu i Sudarbis izlūksnis, Zalta Ubagam – Veiksnys izlūksne.

Jura Cybuļa pīraksteitī jūki sakuortuoti piec nūtikšonys vītys: “Ituo ira bejs pi myusu voi ai myusīm”; “Ituo ira bejs cytur”; “Ituo kur nibejs varātu byut bejs”. Nu turpynuojumā puorejūs treis autoru jūkim veļteita kotram sova nūdaļa.

Aina Kuorkla jau bejuse ari īprīkšejuos gruomotys “Īdzer ols, lai bāduom ira gols” leidzautore. Krapacu Ļuce ir juos skotivis tāls (pajimts nu Jura Cybuļa i Juoņa Ločmeļa gruomotys “Īdzer veina, lai dzeive ira feina!”), ar kurū apbraukuota lela daļa Latvejis. Nu Aizmuorka Berta jūkus Juram Cybuļam syuteit suokuse taišni piec īprīkšejuos gruomotys prezentacejis pasuokuma Kryšānūs, kur jis skateituojus aicynuojs tū dareit. Ari Zalta Ubags beja vīns nu atsauceiguokajim paleigim, īsyutūt sovus jūkus, jau īprīkšejuos gruomotys veiduošonā.

Gruomotys izdeviejs ir Juoņs Ločmeļs, muokslinīks – Praņcs Slyšans.

Gruomotu var īsaguoguot škārsteikla veikalā taiseitslatgola.lv, kai ari gruomotu veikalūs.

Vīns kuorteigs latgalīts izvylcs zalta zivteņu.
– Ja mani palaissi, izpyldeišu tev treis vieliešonuos.
-Vālūs, lai itys vyss iudiņs, kas ira azarā, poursavierš spirtā! I lai nivīna upe nu juo naiztak!
-Nu labi, bet trešū gon izdūmoj kuodu cylvācyskuoku vieliešonūs!
-Un lai vīnumār man iz pokmeļa kārmanie byutu butylka, kas pylna ar šņabi!
-Labi, bet voi tu vari man paruodiet tuodu breinumu kuo passi, kurā raksteits, ka eši latgalīts.
-Lyudzu, verīs i nasabreinoj!

Zalta zivteņa, pasavāruse passie, saceja:
-Kuoda byus tova caturtuo vieliešonuos?

Komentari slāgti.