Reigā varēs sasatikt ar gruomotys “Linejis” autorem

LaKuGa 23. Februars, 2017. gods Comments Off on Reigā varēs sasatikt ar gruomotys “Linejis” autorem
Reigā varēs sasatikt ar gruomotys “Linejis” autorem

Latvejis Gruomotu izstuodis ītvorūs Storptautyskajā izstuožu centrā Kīpsolā leluokam skaiteituoju lūkam tiks prezentāts kruosuojamais dzejūļu kruojums “Linejis” latgalīšu rokstu volūdā.

Gruomotys tekstu autoris ir Jana Skrivļa-Čevere, Ligija Purinaša, Dagneja Dudarjonoka i Gunta Nagle, ilustraceju autore ir Ilze Gailāne, gruomotys redaktors – Valentins Lukaševičs.

Pasasokūt Latvejis Gruomotu izstuodis 2017 organizatorim, ari interesentim Reigā byus vareiba īsapazeit i ar dzejūļu kruojumu “Linejis”, i ar kruojuma autorem.

Sevkura sasatikšona ir lineja: taisna, dzili vylkta voi nā, bezgaleiga voi aprauta. Tok cylvākā kūdulu veidoj vysaidys krystuošonuos ar cytim ļaudim: paraleli, perpendikulari, diagonalai, puortrauktai i napuortrauktai.

Ari kruosojamais dzejis kruojums “Linejis” ir pīcu sīvīšu sasatikšona i sajiutu geometreja, kurā kotra nu jom runoj sovā pasauļa uztveris volūdā i bolsā. Izdavums ir unikals ar tū, ka pīduovoj sovam skaiteituojam byut leidzdaleigam: skaiteit i dūmuot leidza, pīraksteit i, ka gribīs — izkruosuot malnboltuos ilustracejis, kas ritmiski īsalykušys storp dzejūlim.

Piec gruomotys izdūšonys nūtykuši jau treis gruomotys prezentacejis pasuokumi: Daugovpilī – bārā “Artilērijas Pagrabi”, Preiļūs – t/c “Ūga” i Latgolys Kulturviesturis muzejā Rēzeknē. Kotrys nu pasuokumu tyka veiduots atškireigā tematikā, kab atkluotu, cik atškireigys ir kruojuma autoris i īpazeistynuotu ar latgalīšu literaturā vēļ nabejušu kūpdorbu, kas apvīnuojs pīcys rodūšys sīvītis.

Kruosuojamā dzejūļu kruojuma “Linejis” autoris 25. februarī 13.00 gaideis sevkuru interesentu Latvejis Gruomotu izstuodē 2017, Rakstnīka gostu ustobā.

Taipat izstuodis laikā varēs nūpierkt latgalīšu gruomotys, kū pīduovuos taiseitslatgola.lv

Komentari slāgti.