“Pi myusim Latgolā” – par “Dyrbinim” i Juoni Krivtežu

LaKuGa 21. Marts, 2017. gods Comments Off on “Pi myusim Latgolā” – par “Dyrbinim” i Juoni Krivtežu
“Pi myusim Latgolā” – par “Dyrbinim” i Juoni Krivtežu

Svietejūt Jezupa dīnu, raidejums “Pi myusim Latgolā” gastej Daugovpiļs nūvoda kulturys centrā “Vārpa”, kur jau 10 godu dzīd, doncoj i muzicej folklorys kūpa “Dyrbyni”, kai arī sasateik ar Latgolys šmakovkys dadzynuotovys saiminīku Juoni Krivtežu.

Laiks ap Jezupa dīnu eipašs arī Daugovpiļs nūvoda kulturys centra “Vārpa” folklorys kūpai “Dyrbyni”. Koč i tys eistais dybynuošonas datums ir 20. marts, īvārojūt gavieņa tradicejis taišni Jezupa dīna ir ļusteišonuos dīna ari “Dyrbynim”.

Itūgod folklorys kūpa svietej sovu 10 godu jubileju. Vadeituoja Anna Briška atkluoja, ka suokumā DNKC “Vārpa” vadeituoja Inta Uškāne dalinīkim īsacejuse izvierzeit mierki, kū sasnīgt par 10 godim. Dalinīki asūt sacejuši, ka grybātu augt tik tuoli, ka spālātu arenā “Rīga”. Niu pošai Annai Briškai ir prīca par pyrmuo sastuova puišim, par pīmāru, Matīsu Uškānu, kurs paspējs īkaruot skateituoju i klauseituoju sirds iz lelūs skotivu ari uorpus Latvejis.

Desmit pastuoviešonys godu laikā “Dyrbynu” pulkā pabejuši apmāram 60 dalinīki. Izaruod, ka leluokuo daļa nu f/k “Dyrbyni” dalinīkim nimoz nav profesionali vuicejušīs ni muzykys instrumentu spēli, ni vokaluos prasmis, tok par jūs snāgumu koncertūs, festivalūs i izbraucīņūs nivīns vēļ nav žāluojīs.

Kai atkluoja Anna Briška, ar vysaiduokom koncertprogramom “Dyrbyni” prīcynuojuži skateituojus i klauseituojus ari aiz Latvejis rūbežu. Paguojušajā godā bejuse aktiva koncertdarbeiba, “Dyrbyni” divejis reizes paspiejuši pabyut Krīvejā, taipoš arī pagastejuši Fraņcejā.

Sovpus Kuorsovys nūvoda Malnovā saimnīkoj Juoņs Krivtežs. Jis paguojušajā godā attaisejs Latgolys šmakovkys dadzynuotovu i juo radeitais zeimūls “Latgolys Šmakovka” goda laikā jau paspiejs sajimt lobu atpazeistameibu.

Juodasoka, ka Juoņs Krivtežs izzynuojs šmakovkys dareišonys tradicejis Kuorsovys pusē i niu apmaklātuojim pīduovoj na viņ nūraudzeit itū dzierīni, nu ari ekskursejis ar izgleitojūšim stuostim par Malnovys muižys viesturi i kulinarū montuojumu.

Komentari slāgti.