Satikt sovus meistarus varēs ari Latgolā

LaKuGa 21. Marts, 2017. gods Comments Off on Satikt sovus meistarus varēs ari Latgolā
Satikt sovus meistarus varēs ari Latgolā

Nu 31. marta da 2. apreļa vysā Latvejā tautys lītiškuos muokslys meistari, amatnīki, stuostnīki, tautys teicieji, muzykanti i dzīduotuoji aicynuos iz tradicionalū pasuokumu “Satiec savu meistaru”. 

Pasuokuma ītvorūs vysaiduokys nūtikšonys paradzātys ari Latgolā. Baļtinovā varēs vuiceitīs rūtalis, ticiejumus i meiklis, kai ari boltūs dorbus. Bolvūs varēs vaira izzynuot par Zīmeļlatgolys 18. godu symta beigom rakstureigū tārpu, Brīžucīmā – vuiceitīs kūka muokslinīciskū apstruodi. Cyblys nūvoda Leidumnīkūs paradzāta meistarklase ausšonā, adeišonā, kaļva darbineicā, pyušamūs muzykys instrumentu spēlē. Dagdys nūvodā varēs izzynuot vaira par zyvu giušonu, Ambeļūs – sviļpaunīku taiseišonu, kulinarū montuojumu, kai ari pīsadaleit vakariešonā. Naujinis Kulturys centrys pīduovuos jūstu ausšonu, kulinarū montuojumu i daņčus. Saļņovā vysus gaideis tautys muzykanti. Indrā varēs vuiceitīs aust, nu Leivuonā – komplektēt tautystārpu. Taipat Leivuonā ari varēs vaira izzynuot par attīceiguo nūvoda kuozu tradicejom. Preiļūs ruodeis, kai dorbam teik sagataveiti stuovi. Rēzeknē pīduovuos meistardarbneicys ausšonā skolu tehnikā, keramikā, uodys muokslinīciskajā apstruodē, tapuošonā, teiklu sīšonā, kai ari vareibu izzynuot vaira par zuoļu čajim. Vuorkovā vysi tiks gaideiti iz dyumu pierti, Viļakys nūvodā – izzynuot vaira par tuo krīvu tautysdzīsmem. Taipat Škilbānu pogostā varēs aust kokaru dečus, nu Viļānūs – īpazeit gavieņa iedīņus, taiseit lelis i aust lynu dvīļus.

Vaira informacejis par nūtikšonom var atrast “Satiec savu meistaru!” sātyslopā

“Satiec savu meistaru!” tradicionali nūtiks reizē ar projektu “Eiropas amatu prasmju dienas”, kas aizsuokts 2002. godā Fraņcejā i palics par leluokū storptautyskū pasuokumu, kas veļteits omota prasmu saglobuošonai, populariziešonai i nūdūšonai tuoļuok. 2017. godā itamā akcejā pīsadola jau 19 Eiropys vaļsts. Ituo gods pasuokuma centraluo tema ir “Saišu styprynuošona”, akcentejūt saikni storp muokslu i zynuotni, tradiceju i inovacejom, prasmem i eksperimentim, paaudzem, meistarim i muoceklim.

Projekta “Satiec savu meistaru!” byuteiba ir viesteit sabīdreibai par namaterialuo kulturys montuojuma saglobuošonu i puormontuošonu, kai ari meistarim, jūs zynuošonom i prasmem.

Komentari slāgti.