“Pi myusim Latgolā” saruna ar muziki i akteri Oskaru Lustiku

LaKuGa 27. Marts, 2017. gods Comments Off on “Pi myusim Latgolā” saruna ar muziki i akteri Oskaru Lustiku
“Pi myusim Latgolā” saruna ar muziki i akteri Oskaru Lustiku

Raidejuma “Pi myusim Latgolā” veiduotuoji tykuos ar muziki i akteri Oskaru Lustiku Rēzeknis Tautys teatra mieginuojuma laikā Rēzeknis kulturys nomā. Gatavejūtīs Storptautiskajai teatra dīnai, teik dasleipāta “Daudz laimes darba dienā”. Oskars Lustiks smejās, ka jam itamā izruodē asūt pamuļķa lūma.

Skotuvis kolegi Aldis Leidums i Ināra Apele nasliep, ka Oskars ir apbreinuojami talanteigs. “Tod, kod pyrmū reizi jis atguoja pi myusim iz teatri, kod mes spieliejam vīnā izruodē, es, gūdeigi sokūt, beju puorsteigts par juo vīglumu, atbreivuoteibu, kaids jis ir iz skotuves. Man tys beja cīši puorsteidzūši, kai cylvāks, kurs īprīkš nav bejs iz skotuvis, var tai īsajust,” par Oskaru Lustiku soka kolegs Aldis Leidums.

“Teatri Oskars atguoja spielēt godi 4-5 atpakaļ. Saleidzynūši naseņ, bet jis tik dreiži īsajuta, ka vyspuor ir sajyuta, ka mes pazeistam Oskaru 100 godu. Oskars ir cīši talanteigs cylvāks ar vysaidom lelom dobys dūtom bolvom i talantim. Cīši dreiži vysu nūgiun i saprūt,” soka Ināra Apele.

Sovu ceļu da teātra skotuvis atkluoj ari pats Oskars: “Nūtyka vīna izruode “Piļsātā nikod napalīk tymss”. Ar kori mes uzastuojam i Māra Zaļaiskalns saceja, ka tī varātu byut veļ vīna lūma. Tūreiz tai labi saguoja.” Režisore Māra Zaļaiskalns piec izruodis aicynuojuse Oskaru pīsavīnuot akteru kolektivam. Pats Oskars soka, ka teatris jū burtiski īsyuce īškā. Niu patyka pret teatri nav nūplokuse.

Gryutuokuo, naparostuokuo i leluokū lūma Oskaram Lustikam beja Fraņča Trasuna lūma izvadumā “Francis”. Izruode div reizis tyka demonstrāta Latgolys viestnīceibā GORS, i pavysam dreiž tei tiks izruodeita vēļreiz.

Oskara Lustika bolsu varēja dzierdēt ari Latvejis Radejis Latgolys multimedeju studejis veiduotajā raidejumā, kas veļteits Latgolys kongresa temai. Oskars atzeist, ka školā i īprīkš kasdīnā bejs cīši moz informacejis par itū vysai Latvejai zeimeigū nūtikšonu i niu jam ir lels lapnums dasadaleit latgaliskuos aktivitatēs.

Komentari slāgti.