Ar jaunu izstuožu sezonu Rotko centrs svieteis četru godu jubileju

LaKuGa 7. Apreļs, 2017. gods Comments Off on Ar jaunu izstuožu sezonu Rotko centrs svieteis četru godu jubileju
Ar jaunu izstuožu sezonu Rotko centrs svieteis četru godu jubileju

Pīktdiņ, 21. aprelī, ar storptautysku muokslys specialistu diskuseju forumu – seminaru, presis konfereņci i vierīneigu septeņu jaunu izstuožu svineigū atkluošonys pasuokumu Daugovpiļs Marka Rotko muokslys centrys svieteis sovu 4. godadīnu, informej centra puorstuovi.

Jaunuo izstuožu sezona – “Klusuma sezona” Rotko centrā aizasuoks ar skaļu trūksni, prīcu i ļusti, pīduovojūt sovim apmaklātuojim septenis izcilys nūtikšonys Latvejis muokslā i tradicionali paruodūt regiona, Latvejis i uorvaļstu muokslā aktualū.

Klusuma sezonu īvoda nabejuse nūtikšona Latvejis muokslys dzeivē – pyrmūreiz Latvejā teik izstuodāts Edvarda Munka originaldorbs “Advokata Ludviga Meijera portrets”.

Ar pīruodeitu rūkrokstu i atpazeistameibu klusuma notuos īsamirdzēs Ērinys Loulorys (Erin Lawlor) (Lelbritaneja) personalizstuodē “Onomatopoēze” īkļautī dorbi.

Pīktū reizi Daugovpilī nūtiks leluo Latgolys regiona muokslys konkursa izstuode, puļcejūt vaira par 50 regiona muokslinīkim, diskutejūt izstuodē par tukšuma i klusuma formom.

Eipašu jutūni izbūrs Ričards Dennijs (Richard Denny) (Australeja) personalizstuodē “Klusuma ēra”. Ar minimalismu i sīviškeigu smolkumu izapauž Lindys Zīveris (Dāneja/Latveja) viestejums projektā “Klusumā”.

Daugovpiļs muokslineica Sanri teic stuostu par saskaris vysaiduokom formom personalizstuodē “Komunikācija ir atslēga”, sovukuort tīšu i patīsu klusumu izbur nūtikšona i atskots iz tū, runojūt par sakom i dzeivis izmaiņom projektā “X: kritiskā robeža – Černobiļa 30” (Lītova).

Apreļa izstuožu sezona byus apsaverama da 2. juļa, tok Munka originaldorbs apmaklātuojim byus daīmams pat da 19. septembra.

Komentari slāgti.