Izdūta latgalīšu dzīšmu izlase “Celīs, bruoļ!”

LaKuGa 11. Apreļs, 2017. gods 0

Latvejis muziki, sagaidūt Latvejis vaļsts symtgadi, ir īrakstejuši latgalīšu dzīšmu izlasi “Celīs, bruoļ!”, informej Latgolys Producentu grupys puorstuovs Guntis Rasims.

Itūnedeļ leluokai auditorejai teik pīduovuota izlasis tituldzīsme “Pīmiņ, bruoļ”. Dzīsmis teksta autors – Osvalds Kravaļs, muzykys autori – Māris i Valdis Muktupāveli. Dzīsmi izpylda Renārs Kaupers (“Prāta Vētra”), Juoņs Aišpurs (“The Sound Poets”), Ingars Gusāns (“Sovvaļnīks”, “Borowa Mc”), Arņs Slobožanins (“Dabasu Durovys”).

Jaunuo dzīšmu izlase ir muziku veļtejums Latvejai symtgadis svātkūs.

12 latgalīšu dzīsmēs ir apsavīnuojuši vysaidu paaudžu i muzykys stilu muokslinīki: Renārs Kaupers, Juoņs Aišpurs, Kārlis Kazāks, Valters Frīdenbergs, Kristaps Rasims, Aigars Runčis, Arņs Slobožanins, Ingars Gusāns, Andris Eriņš, Guntra Kuzmina, Guntis Rasims, Atis Auzāns, Artūrs Uškāns i daudzi cyti.

Latgalīšu dzīšmu izlase ir atguodynuojums par 1917. goda Latgolys kongresu, kur latgalīši pījēme vaļstiski nūzeimeigu lāmumu – apsavīnuot ar puorejūs nūvodu – Vydzemis i Kūrzemis – latvīšim. Itys lāmums vāluok sekmēja kūpeigys Latvejis vaļsts izveidi.

Izlasē nadaudz cytaiduokūs aranžiejumūs ir īkļautys vysaidu stilu i laikmatu latgalīšu kulturai nūzeimeigys kompozicejis. Ite var atrast i latgalīšu tautys dzīsmis (“Kur gaismeņa”, “Rūžeņa”, “Tuoli dzeivoj” i tml.), i i vysaiduoku stilu i paaudžu zynomys latgalīšu originaldzīsmis (“Skaidra volūda”, “Īt muna tauta”, “Vysskaistuokai meitinei”, “Screen”, “Pusnakts Triādis” i cytys).

Latgalīšu dzīšmu izlasis CD “Celīs, bruoļ!” attaiseišonys pasuokums nūtiks 18. aprelī 16.00 Latgolys puorstuovnīceibā Reigā, Tūrņa īlā 4/III.

Projektu atbolsta: Kulturys ministrejis Latvejis Vaļsts symtgadis birojs i Latgolys Producentu Grupa.