“Kolnasātā” diskuseja par Latgolys muzeju identitati

LaKuGa 22. Apreļs, 2017. gods Comments Off on “Kolnasātā” diskuseja par Latgolys muzeju identitati

“Kolnasātys” diskusejis tema ir Latgolys muzeji. Latgolā ir 18 pošvaļdeibu muzeji i vīns vaļsts muzejs. Dorbojās ari vairuokys privatys iniciativys, kuruos sevi sauc par “muzejim”, tok nav akreditiejuši kai muzeji.

Kūpā ar gaškom Inetu Zelču-Sīmansoni, muzejpedagogi i guoduotovys “Creative Museum” vadeituoju, i Rēzeknis Vaļsts pūļu gimnazejis suokumškolys školuotuoju Ingūnu Zeiļu teik raudzeits saprast, kaida ir Latgolys muzeju identitate i kai viertejams muzeju pīduovuojums. Taipat teik vaicuots atsacejums iz vaicuojumu, voi Latgolys muzeji ir gotovi pošim jaunuokajim apmaklātuojim – bārniem, i kai veidojās muzeja i školuotuoja sadarbeiba.

Pavasarī aktuals palīk vaicuojums par rasādu i sāklu īsaguoduošonu. Guna Igavena rauga izzynuot, voi veikalūs, tiergā i rasādu audzātovuos nūpierkamī rasādi i sāklys ir pīmāruoti Latvejis klimatiskajim apstuoklim i kam juodagrīž viereiba tūs īsaguodojūt. Guna sasatykuse ar Latgolā leluokuos rasādu audzātovys “Sakstagals” īpašneicu Zaigu Graudiņu, kai ari Vaļsts augu aizsardzeibys dīnasta Latgolys regiona vacuokū inspektori Zentu Dūdu.

Komentari slāgti.