Itūnedeļ gaidomys Latgolys pūdnīku dīnys

LaKuGa 24. Apreļs, 2017. gods Comments Off on Itūnedeļ gaidomys Latgolys pūdnīku dīnys
Itūnedeļ gaidomys Latgolys pūdnīku dīnys

Nu 26. da 29. apreļa Latgolā paradzātys tradicionalūs Latgolys pūdnīku dīnu nūtikšonys. Itūgod programā attaiseitūs durovu dīnys Latgolys pūdnīku darbneicuos, teoretiskī lasejumi i izstuodis atkluošona.

Latgolys pūdnīku dīnys 2017 tiks īsuokys ar attaiseitūs durovu dīnom Latgolys pūdnīku darbneicuos 26. i 27. aprelī nu 12.00 da 15.00. Itūgod apmaklātuoji tiks gaideiti Daugovpiļs Muola muokslys centrā, Raivo Andersona keramikys darbneicā Preiļūs, Uģa Puzuļa keramikys darbneicā Alsviķu pogostā, kai ari Olgys i Valda Pauliņu keramikys darbneicā Kruoslovā. 28. aprelī nu 9 reitā da 15.00 attaiseitūs durovu dīna ari Rēzeknis Muokslys i dizaina vydsškolys keramikys nūdaļā.

Pīktdiņ, 28. aprelī, Latgolys pūdnīku dīnu nūtikšonys tiks suoktys ar teoretiskajim lasejumim Latgolys Kulturviesturis muzejā, Rēzeknē. Tymūs varēs dzierdēt ari Eiropys keramikys piļsātu asociacejis generalsekretara i projektu direktora Džuzepis Olmeti referatu. Latveju lasejumūs puorstuovēs Zane Melāne, kas stuosteis par Pītera Martinsona keramikys kolekceju Marka Rotko centrā Daugovpilī, Evija Vasilevska, kas referēs par keramiki Pīteri Gailumu, kai ari Maija Upeniece, kuruos tema byus Latgolys keramika socialajūs teiklūs. Dīna tiks nūslāgta ar cepļa kūršonu puoragri myužeibā aizguojušuo keramika Pītera Gailuma darbneicā Jaungailumūs. Tī tiks ruodeiti paraugdemonstriejumi, kai ari varēs dzierdēt stuostus par i ap pūdnīceibys meistarim.

29. aprelī 10 stuņdēs Pītera Gailuma keramikys darbneicā nūtiks cepļa attaiseišona, kur varēs ari īsaguoduot tikū nu cepļa izjimtūs traukus. Pūdnīku dīnys tiks nūslāgtys 29. aprelī 13.00 Lūznovys muižā, kur tiks atkluota Latgolys pūdnīku pādejuo goda laikā veiduotūs keramikys dorbu izstuode.

Komentari slāgti.