Latgolys školuos nūvodvuiceibys stuņdis vadeis sabīdreibā zynomi kulturys darbinīki

LaKuGa 27. Apreļs, 2017. gods Comments Off on Latgolys školuos nūvodvuiceibys stuņdis vadeis sabīdreibā zynomi kulturys darbinīki

2. majā, īvodūt Latgolys symtgadis kongresu, 41 Latgolys regiona školā nūtiks nūvodvuiceiba kūpā ar Latgolā zynomim kulturys i sabīdriskim darbinīkim, informej Latgolys symtgadis kongresa organizatoru puorstuove Inga Vasiļjeva.

Regiona kulturys personeibys stuosteis par Latgolys kongresu i aicynuos leidzdaleibai Latgalīšu volūdys naktī. Nūvodvuiceibys stuņde byus interaktiva i vysaiduis virtualuos, atjauteibys i kusteibu spēlēs bārni izzynuos nūvodu, byutiskai, ka dzeivuos i prīcuosīs, nūpītnai sprīss latgalīšu volūdā. Taipat školānim byus vareiba sajimt vierteigys duovonys – jaunuokuos gruomotys, muzykys īrokstus i žurnalus. Sovukuort 2. maja vokorā Rēzeknis Tehnologeju akademejā nūtiks jaunuokuo izdavuma, autoru Ilgys Šuplinskys, Leigys Rundānis, Aelitys Andrejevys kūpdorba “Gostūs pi Boņuka. Stuosti bārnim par Latgolu” prezentaceja.
 
Latgolys školuos varēs satikt muzikus Gunti Rasimu, Sovvaļnīku, Juri Vucānu, akteri i muziki Kristapu Rasimu, dzejneicys Inetu Atpili-Jugani, Māreiti Krasnobaju, Ingu Kaļvu, Ligiju Purinašu, medeju puorstuovus Renāti Lazdiņu, Eviku Muiznieci, Ausmu Sprukti, Skaidreiti Svikšu, kulturys i sabīdriskūs darbinīkus Rutu Cybuli, Ilzi Ozoliņu, Sandru Ūdri, Juri Viļumu i cytus.

“Ka gribim, kab myusu bārni runoj latgaliski i apsazynoj latgaliskuos vierteibys, mums juobyut ar jim iz vīna viļņa: respektejūt jūs interesis i pīredzi, myusdīneigi i atraktivi juoīdzeivynoj latgaliskais: volūda, tradicejis, dzeivisveids. 24 sabīdreibā zynomi kulturys darbinīki brauks iz 41 školu, kab kūpā ar bārnim, jaunīšim i školuotuojim runuotu par Latgolys viesturi vysaiduokūs medejūs. Celi vysod ir naizdybynojami, i ari itys projekts naizpalyka bez škieršļu. Par pīmāru, kaidai školai, kas cīši gribēja, kab tī nūtyktu nūvodvuiceibys stuņde, 2. majā vaira nabeja, kū pīduovuot, sovukuort cytai, iz kurū gribēja kaids braukt, atsaroda vysaiduoki argumenti (puorsvorā volūdys nazynuošona – i latvīšu, i latgalīšu literaruos), kab nūvodvuiceibys itamā školā nabyutu,” stuosta projekta autore, Rēzeknis Tehnologeju akademejis profesore, Latgolys symtgadis kongresa pasuokumu organiziešonys dorba grupys lūcekle Ilga Šuplinska.

Atkluojūt Latvejis vaļsts symtgadi, ar daudzveideigu pasuokumu programu tiks akcentāta Latgolys nūzeimeiba Latvejis vaļsts izveiduošonā, kai ari izcaltys Latgolys vierteibys – volūda, kultura i cytys. 2. majā regiona školuos nūtiks nūvodvuiceibys stuņdis kūpā ar sabīdreibā zynomim cylvākim, sovukuort 3. majā Latgolys kulturviesturis muzejā tiks atkluota eipaša Latgolys kongresa symtgadei veļteituo izstuode, tok golvonuos Latgolys symtgadis kongresa svieteišonys nūtikšonys gaidomys Rēzeknē 5. i 6. majā i Daugovpilī 6. majā.

Komentari slāgti.