Bolvūs apsaverama muokslineicu apvīneibys V.I.V.A izstuode

Bolvūs apsaverama muokslineicu apvīneibys V.I.V.A izstuode

Da 17. juņa Bolvu Nūvoda muzejā apsaverama Latgolys muokslineicu apvīneibys V.I.V.A. gleznu izstuode “Izkāpt no ikdienišķā”, viestej informaceja Bolvu nūvoda sātyslopā.

Muokslineicu četrinīka aba rodūšuos apvīneibys V.I.V.A. (Vēsma Ušpele, Ilze Griezāne, Vija Stupāne i Agra Ritiņa) kūpeiguos rodūšuos gaitys suokušuos 2006. godā. Kotrā publiskā dorbu atruodeišonys reizē apvīneiba aplīcynoj, ka rodūšais individualais rūkroksts teik izkūpts vys piļneiguok.

Vysys gleznuotuojis ir nu Latgolys: Vēsma dzeivoj Maltys pogosta Garkolnūs i rodūšū spāku sevī apsazynuojuse jau vydsškolys laikā, partū ari studējuse gleznuošonu Latvejis Muokslys akademejis Latgolys filialē (LMA LF) i sajāmuse muokslys bakalaura gradu, itūšaļt kūpā ar veiru Aivaru aktivai dorbojās pūdnīku darbneicā “Malny Wylky”. Ilze kasdīnā voda Latgolys muokslys i omotnīceibys centra dorbu Leivuonā, ari LMA LF sajāmuse bakalaura gradu, nūpītnai gleznuošonai dasavārsuse nu 2006. goda. Vija dzeivoj Preiļu nūvodā Kasterā i audzynoj pīcus dālus, atrūnūt laiku ari gleznuošonai, kū jei ir vuicejusēs LMA LF, ir muokslys bakalaurs. Agrys rodūšais ceļš ir ilgstūšs i cīši saisteits ar juos kai pedagoga dorbu nu 1997. goda, ari jei studējuse LMA LF i vāluok sajāmuse ari magistra gradu muokslā LMA.

Nu 2012. goda V.I.V.A. dorbi kotru godu apsaverami vairuokuos izstuodēs i Latgolā, i Reigā, kai ari uorpus Latvejis (Lītovā, Boltkrīvejā). Vysys gleznuotuojis pārņ pīsadaleja “Jāzepa Pīgožņa (1934-2014) balva Latvijas ainavu glezniecībā” izstuodē. Vēsma Ušpele par sovu Latvejis ainovu materializaceju iz audaklim beja nomināta golvonajai bolvai. Gleznuotuojis aktivai pīsadola vysaiduos grupu izstuodēs, kasgadejā Latgolys muokslinīku dorbu rudiņa izstuodē Latgolys kulturviesturis muzejā, rodūšūs i pīredzis braucīņūs aiz Latvejis rūbežu, plenerūs Preiļūs, Jiurmolā, Varakļuonūs, ir gaideitys i īsasaistejušys vysaiduokuos muokslys i kulturys nūtikšonuos.

Karteņa: balvi.lv

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]