Lūznovys muižā atkluos dzīsminīka Vinsenta Kūkuoja albumu

LaKuGa 3. Majs, 2017. gods Comments Off on Lūznovys muižā atkluos dzīsminīka Vinsenta Kūkuoja albumu

7. majā 16.00 Lūznovys muižā tiks atkluots dzīsminīka Vinsenta Kūkuoja pyrmais albums “Breineigō nosta”, viestej muižys puorstuove Inga Drele.

Vinsents Kūkuojs ir latgalīšu dzīsminīks, kurs regulari pīsadola Latvejis dzīsminīku kusteibys pasuokumūs, nu muzicēt suocs vēļ studeju laikā, par sovu dzīšmu pamatu izlosūt na tik poša tekstus, nu ari dzeju – i tāva Ontona Kūkuoja, i cytu autoru dzejūļus. Par dzīsminīka byušonu pats Vinsents soka: “Ka tu esi dzīsminīks, tev juobyut saskarsmei ar publiku! Tī ir tys cymuss, ka vari vysu izmaineit i izsaceit sovys emocejis, kaidys gribi.”

Dzīsminīka albumā “Breineigō nosta” īraksteitys 17 dzīsmis. Tamuos i ar sovim, i tāva dzejis vuordim Vinsents dasyt pi myusu sirdsapzinis i atguodynoj, cik daudz spāka sevī globoj Latgola. Albuma īrokstā pīsadalejuši ari Rihards Kūkuojs, Pīters Daugulis, Aivars Sarnovičs, Einārs Lipskis, Mārcis Lipskis. Albuma izdeviejs ir bīdreiba “Latgolas tradicionalōs kulturas centrs “Latgaļu sāta””, izdūšonu atbolsta bīdreiba “LR”.

Īīšona koncertā ir bez moksys, vītu pyrma tuo lyugts dasaceit telefoniski, zvonūt 29390701 voi 28686863.

Komentari slāgti.