Cyldynuoti apbolvuojuma “Laiks Ziedonim 2017” laureati (+galereja)

LaKuGa 5. Majs, 2017. gods Comments Off on Cyldynuoti apbolvuojuma “Laiks Ziedonim 2017” laureati (+galereja)

3. majā, Imanta Zīdūņa (Ziedoņa) dzimšonys dīnā, Latgolys viestnīceibā GORS, Rēzeknē, nūtyka catūrtuo apbolvuojuma “Laiks Ziedonim” laureatu cyldynuošonys ceremoneja. Apbolvuojuma laureati ir Laura Putāne, Kristaps Rikāns, Laima Liepiņa, Jana Kolbina i Kārlis Agris Gross.

Vysi laureati sajēme tieļneicys Olgys Šilovys veiduotū Imanta Zīdūņa statueti i naudys bolvu 3000 eiro apmārā, kū nodrūsynoj mecenati Boriss i Ināra Teterevi.

Nūvodpietnīceibys nominacejis “Kedas” laureate Laura Putāne voda Štutgartis latvīšu tautys deju kolektivu “Trejdeksnītis” i Frankfurtis deju kolektivu “Dimdari”. Kai vīns nu leluokajim sasnāgumim ir Laurys apsajimšona nūorganizēt pasuokumu 2017. goda junī –“Eslingenas Dziesmu svētkiem 70”.  “Gon tikt izvierzeitam apbolvuojumam, gon palikt par nominantu ir cytu cylvāku izsaceits nūviertiejums tam, kū tu dori. Tys ir dziļš spāka olūts, kas pīpylda i īdvasmoj. Paļdis fondam “Viegli” i vizionarim, kurim ir nūzeimeigi paruodeit i cyldynuot cylvākus, kurī aizrauteigi, ar vysu sirdi i dvēseli, nasavteigai dora nūzeimeigu dorbu latviskūs tradiceju saglobuošonā. Mani īdvasmoj sevkura nominanta stuosts i dorbi i varu tik apstyprynuot, ka uorpus Latvejis dzeivoj daudz īdvasmojūšu personeibu. Nominacejis “Kedas” laureata apbolvuojumu es radzu kai apbolvuojumu sevkuram, kas, kotrys piec sovu vareibu, tikpat aizrauteigai svešumā uztur dzeivu latviskū. Izjiutu itū apbolvuojumu kai spieceigu saiti storp latvīšim uorpus Latvejis i ar Latveju, partū ka mes asam vīna tauta ar vīnu zemi i vīnu dvēseli.”

Tautsaimisteibys nominacejis “Zemi es mācos” laureats Kristaps Rikāns, ASV uzjāmuma “Ubiquiti Networks” Latvejis filialis “U-Labs” vadeituojs nu Īcovys, kurs audzs i izagleituojs Latvejā, sajiems pīredzi ASV, niu attaisejs Reigā pasauļa leimiņa uzjāmumu. Kristaps Rikāns par apbolvuojumu: “Itys laureata tituls ir pīruodejums maņ pošam i cytim, ka atsagrīsšona dzimtinē bejs pareizs lāmums i Latveja ir zeme, kur cylvāki var padareit lelys lītys na tik sportā i kulturā, nu arī inženertehnologeju jūmā pasauļa mārūgā.”

Dzeive literaturā “Bize” laureate Laima Liepiņa, Grūbenis nūvoda Grūbenis pogosta bibliotekys vadeituoja. Apkolpoj apmaklātuojus na tik bibliotekys telpuos, nu ari ar bibliobusu, kas ir Laimys leluokais eistynuotais projekts jau ostoitū godu. “Tei ir nadaudz cytaida pamaneišona. Tys nūzeimoj byut tūs vydā, kam nūzeimeigi kolpuot cylvākim, jūs parūceibai, jūs lobumam. Pamaneit cytaidū i tū daudzynuot, kab cyti pamona i sajam idejis. Cylvāki ir aplīcynuojuši, ka bibliotekai ir juoīt pi skaiteituoja. Bibliobusim byus byut. Kab myusu pīmārs īdvasmuotu pošvaļdeibys i bibliotekarus cytūs nūvodūs Latvejā byut cytaidim, vaicuot jaunys idejis i dorbuotīs,” soka Laima.

Bārnu i jaunīšu nominacejis “Rabarbers” laureate Jana Kolbina – 22 godus vaca jaunīte nu Solyspiļs, studej Latvejis Universitatis Pedagogejis, psihologejis i muokslys fakultatē i struodoj Reigys Valdorfškolā. Jana ir pozitiva, rodūša, atvārta vysam jaunajam, praseiga pret sevi, sapņuotuoja, kas tic, ka kaidu dīnu cylvāku smaidi pīvarēs pasauļa naidu. “Kod muns Rabarbera ceļš tik suocēs, dzierdieju kaidu Anitys Krūmiņys (sīvīte, kas mani dasaceja itai nominacejai) interviju, kur jei saceja: “I cylvāks patīsai kai taids rabarbers izalauž caur vīnaldzeibu, caur rutinu, caur pelieceibu. Jana ir izauguse taidā naparostā vītā Solyspilī… i ir izauguse daudzim par prīcu. Sevkurs var īt pi juos veļdzētīs i jimt spāku nu juos. Tys mani puorsteidz.” Rabarbers tys ir vēļ vīns ceļa pūsmys. Pūsmys ceļā iz sevi. Es nikod navierteju rezultatu, vysod par nūzeimeiguokū skaitu ceļu, ari itymā gadīnī – sasatikšona ar vizionarim, īsapazeišona ar nominantim, ar fonda cylvākim – tys beja nūzeimeiguokais, interesantuokais, boguotynūšuokais,” stuosta Jana.

Zynuotnis nominacejis “Taureņu uzbrukums” laureats Kārlis Agris Gross – Reigys Tehniskuos universitatis Naorganiskuos sintezis instituta pietnīks, doktora grāds materialzynuotnēs. Sovā pietnīceibys nūzarē Kārlis ir struoduojs 30 godu, treis kontinentūs, i saprats, cik nūzeimeiga ir sakuortuoteiba vysūs leimiņūs, kab izgataveitais materials dūtu vyslobuokuos īpašeibys. Kārlis Agris Gross par sajimtū apbolvuojumu: “Naasu nikod īsadūmuojs, ka byušu izvierzeits itaidam apbolvuojumam. Dzeivoju kai maņ ir vuiceits – struoduot rodūši, veiksmeiguok puorvarēt škieršļus i dorbuotīs, kab veicynuotu sabīdreibys atteisteibu. Asu laureats zynuotnē, partū grybu izceļt temu, kas aizgiun na tik munu pietnīceibys vierzīni materialu zynuotnē, nu ari cyta veida jūmys. Itys apbolvuojums dūd skaidru zeimi cytim, ka mes vēļ varam augt, ka vēļ ir juoaug i juovaicoj veidu, kai augt kotru dīnu, kab mes byutu atjaunuoti i dorbuotūs ar jaunu energeju. Vuiceit akademiskū raksteišonu i zynuotnis rokstu izveidi nabeja muns mierkis, atbraucūt iz Latveju, nu tū beja juoizveidoj, kab paleidzātu cytim komunicēt zynuotnis jaunumus. Sajamūt laureata titulu, maņ ir cereiba, ka puormainis turpynoj vierzeit kotru iz prīšku, ka mes varam apsavērt, kū var dūt, na, kū var jimt. Maņ ir cereiba, ka Latveja ir vīta, kur atteisteit rodūšumu, inovacejis, ar vareibom atsateisteit i sasnīgt rezultatus pasauļa mārūgā.”

Imanta Zīdūņa fonds “Viegli” apbolvuojumu „Laiks Ziedonim” īdybynuojs 2014. godā, kab īdvasmuotu, nūviertātu i cyldynuotu jaunradi, kai ari dzejnīkam Imantam Zīdūņam nūzeimeiguos vierteibys – izcileibu, degsmi, syuteibu, stuoju, veiksmi i sovpateibu, kas jau trešū godu teik vaicuotys sevkura pretendenta personeibuos.

Kartenis: Margarita Germane

Komentari slāgti.