“Borowa Mc” pīduovoj jaunu dzīsmi “Eima, eima”

LaKuGa 10. Majs, 2017. gods Comments Off on “Borowa Mc” pīduovoj jaunu dzīsmi “Eima, eima”

Latgalīšu muzykys grupa “Borowa Mc” piec ilguoka puortraukuma klauseituojim pīduovoj jaunu dzīsmi “Eima, eima”. Dzīsme ir kai pagrīzīņa punkts grupys planūs īraksteit jaunu albumu.

Dzīsmei par pamatu jimta latgalīšu tautys dzīsme, kuruos apdari veiduojuse Guntra Kuzmina. Dzīsmis teksta autors ir Aigars Runčis, tymā izmontuoti ari tautys dzīsmis vuordi.

“Mums pateik struoduot ar tautys dzīsmem, interpretejūt tuos sovā veidā, caur vysym zynomū izstuostūt jaunu stuostu. Ari dzīsmē “Eima, Eima” izstuostom jaunu stuostu. Lelai daļai klauseituoju ruodeisīs, ka itei dzīsme ir par mīlesteibu, kas tai ari ir. Tik kaidu!? Mīlesteibys ir tik dažaidys! Es itū dzīsmu veļteju sovom mozajom meiteņom,” stuosta grupys solists Aigars Runčis.

Dzīsmis īrokstā “Borowa Mc” sasadorbuojuse ar grupys jau īrostū producentu Gintu Stankeviču.

Grupys “Borowa Mc” tyvuokuo uzastuošona paradzāta jau 21. majā Latgolys muokslys svātkūs “Krāsas karogā” Daugovpiļs nūvoda Vyškūs.

Komentari slāgti.