21. majā Daugovpiļs nūvoda Vyšku pogosta estradē nūtiks Latgolys muokslys svātki “Krāsas karogā”, kur muzykys i muokslys pasuokumā tiks aplīcynuotys Latgolys kulturys vierteibys, rodūšais gors i spylgtuo ideņtitate, informej Daugovpiļs nūvoda Kulturys puorvaļdis vadeituoja Ināra Mukāne.

Svātku programā paradzāts latgalīšu muzykys koncerts, kurymā aicynuoti pīsadaleit kori, folklorys kūpys, vokalī ansambli, kapelys, kai ari jaunūs muziku grupys i zynomi solisti. Koncertā skanēs dzīsmis i muzyka, kas nūzeimeigūs viesturiskūs pagrīzīņūs īdvasmuoja Latgolys ļauds pastuovēt par sovu tāvu zemi. Svātkūs tiks akcentāts Latgolys kulturys spāks ar myusu regionam rakstureiguom dzīsmem, dejom i Latgolys gleznuošonys lelmeistaru dorbim.

Daleibā svātkūs dasasacejuši 70 kolektivi nu Latgolys nūvodim. Kūpā ar korim, folklorys kūpom, vokalajim ansamblim i  orkestrim muzicēs Igauņu saimis ansamblis, muzikis Artūrs Uškāns, grupys “Borowa MC”, “Dabasu durovys”, “Bez PVN”, “Sovvaļnīks”, “Ausmeņa records”, “Tautumeitas”, solisti Andris Baltacis, Dināra Rudāne, Guntra Kuzmina, Agate Jermaļonoka, Sandis Ulpe, Laura Bicāne. Koncertā pīsadaleis tautys deju ansambli, Daugovpiļs Latvīšu kulturys centra pyušamūs instrumentu orkestris “Daugava” i Naujinis Muzykys i muokslys školys pyušamūs instrumentu orkestris.                 

Latgolys muokslys svātku “Krāsas karogā” programys ītvorūs izdūta latgalīšu dzīšmu izlase “Celīs, bruoļ!”, kū īrakstejuse Latgolys Producentu grupa.

Vyšku pogosta gleznainuo ainova i dzeivis telpa īdvasmuos muokslinīkus plenerā. Nu 17.30 pi Vyšku estradis tiks izstuodeiti rodūšī dorbi. Itamuos aktivitatēs īsasaisteis muokslineicu apvīneiba “V.I.V.A.”, Špogu i Naujinis muzykys i muokslys školu audziekni.

Svātku programa suoksīs 18.00 ar svātbreidi Vyšku Rūmys katuoļu bazneicā, turpynuosīs ar dalinīku guojīni i 19.00 nūsaslēgs ar koncertu Vyšku estradē.