Pyrmūreiz Latvejā izdūta Ontona Rupaiņa gruomota “Baltie tēvi”

LaKuGa 12. Majs, 2017. gods 0

Latgolys Kulturys Centra izdevnīceibā Rēzeknē izdūts rakstnīka Ontona Rupaiņa viesturiskais romans “Baltie tēvi”. Romana darbeiba rysynojās vydslaiku Latgolā, atkluojūt dominikaņu klūstera i bazneicys, niulenejuos Aglyunys bazilikys, dybynuošonu. Tys ir pyrmais ituo vierīneiguo prozys dorba izdavums Latvejā atseviškā gruomotā i radeits kai veļtejums Latgolys kongresa symtgadei. 

Romanu “Baltie tēvi” Ontons Rupaiņs pīrakstejs pyrma Ūtruo pasauļa kara. Tys pyrmūreiz publicāts 1937. godā turpynuojumūs žurnalā “Atpūta” i izapeļnejs lelu skaiteituoju atsauceibu. Trymdā Rupaiņs dorbu pi romana suocs pavysam nu jauna. Romans izdūts 1963. i 1964. godā Tylta apguodā Mineapolē (ASV) latvīšu literarajā volūdā, dīzgon stypri atsaškirūt nu pyrmuo varianta. Niu romans “Baltie tēvi” gols golā izdūts Latvejā vīnā lelā, 462 puslopu bīzā gruomotā.

Atkuortuotais izdavums izdūts pasasokūt ilggadejam Latgolys Kulturys centra izdevnīceibys dybynuotuojam i vadeituojam Juoņam Eļkšņam i juo komandai, kai ari Ontona Rupaiņa dālam Juoņam Rupaiņam, kurs dzeivuoja ASV Denverā (mirs 2016. goda 17. majā) i juo dzeivisbīdrei Betijai Rupainei, ari Pīteram Ragaušam, kurs īt nu Andryva Jūrdža dzymtys, dzeivoj Hjūstonā, ir Baļtejis – Amerikys fonda direktors.

Juoņs Elksnis godu gaitā nu jauna izdevs jau vairuokys O. Rupaiņa gruomotys: “Tauta grib dzeivōt”- 1991.g., “Jaunō skūlōtōja”- 1991.g., “Pasaules vējos”- 2000.g., “Māra mostas”- 2016. g. Teik dūmuots izdūt no jauna O. Rupaiņa viesturiskū romanu “Zemes sōļs” i “Jaunō skūlotōja”.

Trilogejis “Māra mostas” izdavums tyka izdūts kai veļtejums rakstnīka 110. dzimšonys dīnai, kas tyka atzeimuota 2016. goda septembrī. Gruomotys piecvuordu pīrakstejuse dzejneica i literaturzynuotneica Paulīne Zalāne – Vallena.

Rakstnīks Ontons Rupaiņs dzims 1906. godā Bieržgaļa (niu — Leņdžu) pogosta Pūriskūs. Latvejis breivvaļsts laikā struoduojs par školuotuoju, kordirigentu, režisoru. Ūtruo pasauļa kara beiguos devīs trymdā, dzeivuojs ASV. Pīrakstejs da šam nūzeimeiguokūs i apjūmeiguokūs prozys dorbus par Latgolys viesturi — “Baltie tēvi I — II” (1936 — 1937), “Māra mostas I — III” (1951 — 1956), “Tauta gryb dzeivōt” (1953), pietejumu par senvolūdu izceļsmi “Arheolingvistika” (1967). Mirs 1976. godā ASV, palnu urna puorapglobuota Bieržgaļa kopūs.

Roksta autore: Olga Pekša, O. Rupaiņa muzeja vadeituoja