Latgolā nūtiks XX Latvejis tautys muzykys svātki

LaKuGa 24. Majs, 2017. gods Comments Off on Latgolā nūtiks XX Latvejis tautys muzykys svātki

27. majā, turpynojūt Latvejis vaļsts symtgadis nūtikšonu cyklu, kas veļteits Latgolys kongresa symtgadei, nūtiks XX Latvejis tautys muzykys svātki, informej Latvejis Nacionalais kulturys centrys.

Svātki puļcēs 30 tautys muzykys kolektivus nu Latvejis i sābru vaļstim. Svātku koncerts skanēs Ludzys piļskolnā, sovukuort īskanis koncerti pīskandynuos apleicīnis nūvodus – Kuorsovu, Cyblu i Zylupi.

27. majā laikā nu 11 da 12.30 Kuorsovys, Cyblys i Zylupis nūvodūs sevkuram interesentam byus vareiba dzierdēt XX Latvejis tautys muzykys svātku īskanis koncertus. Vokorā 17.00 Latvejis vacuokajā piļsātā Ludzā klauseituoji aicynuoti iz lelū svātku koncertu, kur tautys muzykys skaņuos tiks izstuosteits stuosts par treis lobom lītom. Koncertā pīsadaleis kapelys, folklorys spielmani i tautys muzykys ansambli nu Latvejis, Lītovys, Igaunejis i Boltkrīvejis.

XX Latvejis tautys muzykys svātkus reikoj Latvejis Nacionalais kulturys centrys i Ludzys nūvoda dūme, īīšona koncertūs – bez moksys.

Komentari slāgti.