Izsludynuots P. Jurciņa jubilejam veļteits jaunūs literatu konkurss

LaKuGa 5. Juņs, 2017. gods Comments Off on Izsludynuots P. Jurciņa jubilejam veļteits jaunūs literatu konkurss
Izsludynuots P. Jurciņa jubilejam veļteits jaunūs literatu konkurss

Rēzeknis nūvoda pošvaļdeibys Nautrānu pogosta puorvaļde sadarbeibā ar Latgalīšu volūdys, literaturys i kulturviesturis školuotuoju asociaceju izsludynoj konkursu par dzejnīka Pītera Jurciņa premejis pīškieršonu jaunajim literatim. Konkursa devīze: “Tys spāks, kas pošā rūdams, tys lobim ļaudim dūdams.” (P. Jurciņš).

Konkursa mierkis ir gūdynuot nūvodnīka dzejnīka, jaunūs literatu školuotuoja Pītera Jurciņa pīmiņu, apzynuot jaunūs talantus i rūsynuot gribu i uzadreiksteišonu pošizasaceit, kai ari izkūpt spieju īraudzeit pasauļa kūpsakareibys i veiduot sovu attīksmi.

Konkursā aicynuoti pīsadaleit vysu vacumu autori, kurī roksta dzeju, prozu voi dramaturgeju. Tiks vierteiti vēļ napublicāti dorbi. Juoīsnādz ni mozuok par 10 dzejūlim voi septeņom A4 formata lopom prozā voi dramaturgejā.

Dorbus var īsnīgt obejūs latvīšu volūdys paveidūs: latvīšu literarajā volūdā i latgalīšu rokstu volūdā. Īsyutūt dorbus, autorim titullopā juonūruoda sovs vuords (literarais pseidonims), kontakttelefons i kontaktadress (elektroniskais i posta), dzimšonys gods i vuiceibu īstuode voi nūsadorbuošona. Dorbi juoīsyuta elektroniski Nautrānu pogosta puorvaļdei iz e-postu livija.rogovka@inbox.lv da 26. juņa. Autorim diveju dīnu laikā elektroniski tiks nūsyuteits apstyprynuojums, ka dorbs registrāts konkursam.

Viertejūt dorbus, žūreja vīnaiž jims vārā tūs originalitati, literaruos i dramaturgiskuos kvalitatis.

Apbolvuošona nūtiks 2017. goda 29. junī Nautrānu pogosta Rogovkā. Veiksmeiguokūs dorbu autorim viertiešonys komiseja pīškiers bolvys: 1. vītai – 100 eiro, 2. vītai -75 eiro, 3. vītai – 50 eiro.

Karteņa: momenti.lv (Inese Bērziņa)

Komentari slāgti.