Par šmakovku i turismu

LaKuGa 6. Juņs, 2017. gods Comments Off on Par šmakovku i turismu

Intervejis autore Laura Stepiņa

Latgolys Šmakovka Malnovā ir vīta, kur izbaudeit Latgolys šmakovku aba garšu i pasasmeļt energeju. Juoņs Krivtežs – Šmakovkys saiminīks – ir eistyns latgalīts, kurs aktivi struodoj pi tuo, lai ari Malnovys pusē byutu vāruojama ekonomiskuo augšupeja. Pošlaik turistim ir vareiba gasteit Malnovā vysu dīnu – gon gordai paēst, gon apsavērt tūs Hitlera bunkurus i izbaudeit vairuoku sortu šmakovkys.

Kai roduos ideja par Latgolys Šmakovkys izveidi?

Pyrmkuort, jau deļtam, ka nikod nabeju pamets dzymtū Malnovu, ari studeju laikā Reigā gondreiž kotrys breivdīnys brauču iz Latgolu i beja apziņa, ka ir joatdūd poruods dzymtai pusei, ka jei mani izaudzynuoja taidu, kaids es asu! Navarieju sasamīreit ar tū, ka beja tai, kai “runoj”, ka ite ir depresivs regions, nikas nanūteik, vysu ver cīt, tymā pat laikā vītejuo vara šmuki gierbās i gleiši runoj jau 30 godu garumā, siežūt iz vaļsts budžeta olgu nasaprazdami, ka teišom asam tuoli nu Reigys i ka teišom ir problemys, kuru rysynuošonai šmuku runu ir par moz. Vajag īguļdeit lelu dorbu, lai nūstuodeit vītejūs uzjiemiejus vīnleidzeiguos pozicejos koč voi ar Preiļu uzjiemiejim, kam nav rūbežys gar molu, kai tys ir Kuorsovys i cytūs nūvodūs. Malači lauksaimnīki i cyti asūšī uzjiemieji, kas investej atteisteibā, ražoj, eksportej, bet jūs ir par moz, vajag radeit jaunus i jaunus, lai pošvaļdeiba spātu iztikt bez izleidzynuošonys fonda naudys.
Ar sovu darbeibu ceru suokt kēdis reakceju, ka ari cyti jaunīši brauks prūm iz Reigu, uorzemem, atsagrīzs, izkruos pīredzi struodojūšūs uzjāmumūs, uzkruos kapitalu i izveiduos nalelys/lelys ražuotnis dzymtajā golā tymā jūmā, kas pošim ir saistūša, – voi tei ir dronu ražuošona, e-komercejis pakolpojumu snīgšona voi turisms.
Vysa atteisteiba teik plānuota, dorūt tū, kas šudiņ aktuals, reit jau vairs nav; ir napuortraukti juopīsalāgoj, josamaina laikam leidza.

Izveiduots iņteresants logo. Kai tys roduos, i kū tys nūzeimej?

Pyrmais, kas Malnovā suokce ražuot šmakovku, beja muižnīks Nikolajs Šadurskis. Kod 19. gs atcēle dzymtbyušonu, zemnīki atsasaceja piļdeit klaušys i ar sokumim padzyna jū, vīneigī, kas beja palykuši juo pusē, beja suņs i uozs, kas ari sorguoja mīžu vuorpu, paleidzādami jam saglobuot darynuošonys tehnologejis.

Kas ir jiusu leluokī paleigi?

Vysleluokais atbolsts i paleidzeiba beja nu saimis, nu tāva, nu cylvākiu, kurus īpazynu, veidojūt Latgolys šmakovkys muzeju, i nu draugu, kuri atsasauce iz kotru paleigā saucīni.

Kaids turisma maršruts pošlaik teik pīduovuots?

Beidzūt asam pīpiļdejuši nūvoda sapynu, spiejam uzjimt lelū autobusu ar turistim i nūdrūsynuot jim ekskursejis programmu vysai dīnai. Maršrutu mes operativi mainom atkareibā nu tuo, cikūs gosti īsarūn myusu golā – ka nu Reigys, tod suocam ar pušdīnem muižnīka gaumē pi Latvju saimineicys Ainys “Dzīlēs”, īmam pa muižnīka atstuotim pādim, apsaverūt juo saimnīceibu, parku i muižu, kurys parkā ir apslāpti Hitlera bunkuri, leidz atīmam da Latgolys šmakovkys muzeja, kur var izbaudeit Latgolys goru i dazynuot iedīņu i dzierīņu pagataveišonys tehnologejis.

Voi šmakovkys dadzynuotovā teik gataveitys dažaidu sortu šmakovkys? Kotram sortam ir sova zaceite?

Pošlaik turistim teik pīduovuota vairuoku veidu šmakovka. Prūtams, pi ūgu uzliejuma špeks nasaprosa pat eistam latgalīšam, deļtam kotram sortam sova zaceite. Bet seikuok par tū vysu var dazynuot iz vītys!

Cik īinteresāti ir turisti?

Turistu plyusma ar kotru godu aug, bet zam tuo vysa stuov pamateigs dorbs. Lai cik sovaiži naizaklauseitu, stypri paleidz konflikti i namīri pasaulī, cylvāki suoc baudeit Latgolu. Kai pīaug turistu plyusma, tai uzaloboj i dažaidojās pīduovojums, serviss i jūma var atsateisteit tuoļuok. Dīvamžāļ pagaidom mes navarim runuot par desmitim tyukstūšu cylvāku, kod sasnīgsim miljonu godā, varēsim runuot par turisma jūmu kai taidu. Tys, ka agenturys saskaita vysus kopejneicu, muzeju i vīsneicu apmaklātojus vīnā maisā i nūsauc grandiozu ciparu – tys pavysam nav tyvu realitatei, juodola vysmoz ar 10.

Niu ir atvārti vysmoz treis leluoki i mozuoki šmakovkys muzeji, ar kū Malnova ir eipaša?

Kai saceja apmaklātuoji, kas ir bejuši vysūs, – vysi ir eipaši i unikali, tai ka ir vārts apmeklēt vysus.

Kaidi ir nuokūtnis plani?

Pīsaistiet nūvodam 10 000 moksuotspiejeigu turistu četrūs turisma sezonys mienešūs, lai maņ voi kaidam cytam byutu rentabli uzturēt vīsneicu ar individualim numurenim vysmoz 50 cylvākim.

Pīsasokit gostūs pa teleponim: +37128321856, 26538016  voi rokstūt
latgalessmakovka@gmail.com

 

Komentari slāgti.