Latvejis Radeja veiduos apraidis lūgu Latgolā

LaKuGa 8. Juņs, 2017. gods Comments Off on Latvejis Radeja veiduos apraidis lūgu Latgolā
Latvejis Radeja veiduos apraidis lūgu Latgolā

Suocūt ar 9. juni Latvejis Radejis 1 frekveņcēs Rēzeknē, Daugovpilī i Dagdā vīnu stuņdi reizi nedeļā skanēs eipaši Latgolys regionam veiduots saturs, informej radejis puorstuove Ilze Zvaigzne. Kotru pīktdīni laikā nu 15.05 da 16.00 Latvejis Radejis 1 trejuos Latgolys frekveņcēs skanēs Latgolys multimedeju studejis veiduota programa, nu puorejuos LR1 frekveņcēs turpynuos skanēt īrostuo programa.

Stuņdi garajā raidejumā “Latgolys stuņde” skanēs diskusejis ar Latgolys regiona uzjiemiejim, politikim i sabīdriski aktivim cylvākim, kai ari regiona aktualitatis i kulturys nūtikšonu afiša. Pyrmajā raidejumā tuo vadeituojs Jurs Saukāns studejā aicynuos vysaiduoku jūmu puorstuovus, kab puorrunuotu da šam asūšūs regiona informativuos telpys styprynuošonys pasuokumus i pošvaļdeibu vieliešonu rezultatus. Puorraidē tiks stuosteits ari par Latgolys symtgadis kongresa rezonaņsi i lāmumim, kas tamā pījimti, tymā skaitā vierzeitūs grūzejumus lykumā par svātku i atceris dīnom, īkļaunūt tymā 27. apreli kai Latgolys dīnu.

Apraidis lūgs Latgolys regionā teik veiduots, kab īsaisteitu vītejūs dzeivuotuojus dažaidu regionam byutisku procesu vierzeišonā, styprynuotu informativū telpu pīrūbežā i, sasadorbojūt ar sabīdriskū televizeju i portalu LSM, pīduovuotu plotu regiona informacejis daudzumu ari škārsteikla i socialūs teiklu lītuotuojim. Latvejis Radejis Latgolys Multimedeju studejis vadeituoja Renāte Lazdiņa pastreipoj: “Raidejums “Latgolys stuņde” ir sūļs sūpluok na viņ informativuos telpys styprynuošonai pīrūbežā, nu ari kvalitativys diskusejis veicynuošonā sabīdreibā, kas da šam vītejā medeju vidē nateik pylnvierteigai nūdrūsynuota. Tys ir ari vīns nu veidu, kai saglobuot i popularizēt latgalīšu volūdu tepat Latvejā.”

Komentari slāgti.