Goda beiguos Rēzeknē nūtiks 10. latgalistikys konfereņce

LaKuGa 19. Juņs, 2017. gods 0
Goda beiguos Rēzeknē nūtiks 10. latgalistikys konfereņce

30. novembrī i 1. decembrī Rēzeknē nūtiks 10. storptautyskuo latgalistikys konfereņce “Myusu dīnu latgalīšu volūda”, kas byus veļteita myusu dīnu latgalīšu raksteibys pyrmuos normativuos apsprīdis
110 godu jubilejai i niulenejūs raksteibys nūsacejumu desmit godim, informej konfereņcis koordinatore Dr. philol., profesore Ilga Šuplinska.

Latgalistikys konfereņcis da šuo ir nūtykušys Sanktpīterburgā (Krīveja, 2008), Rēzeknē (Latveja, 2009), Greifsvaļdē (Vuoceja, 2010), Poznaņā (Pūleja, 2011), Reigā (Latveja, 2012), Ačynskā (Krīveja, 2013), Rēzeknē (Latveja, 2014), Viļņā (Leitova, 2015), Rēzeknē (Latveja, 2016). Itūrudiņ latgalistikys konfereņce teik reikuota jau dasmytū reizi Rēzeknis Tehnologeju akademejā kai nūslādzūšuo konfereņce itymā konfereņču cyklā.

Konfereņcis temys:

  • aktuali latgalīšu volūdys kūpšonys vaicuojumi
  • latgaliski raksteitais vuords laiku lūkūs
  • latgalīšu literatura latvīšu i regionaluos literaturys koņtekstā
  • latgalīšu volūdys vuiceišonuos i nūvodvuiceibys metodologiskī aspekti
  • Latgolys sabīdryskūs i kulturys darbinīku dūtais Latvejis vaļsts izaveiduošonā, nacionaluos i kulturys ideņtitatis styprynuošonā
  • etniskuo, teritorialuo, nacionaluo i c. ideņtitatis, jūs atsaspīgeliešona pīrūbeža kulturā i volūdā
  • regionalūs, mazuok lītuotūs i minoritašu volūdu kūpšonys pīredze, literaturys atteisteiba

Dasacejumi konfereņcei (dalībnīka anketa i referata anotaceja da 1500 rokstu zeimu, īskaitūt atstarpis) teik gaideiti da 3. novembra, adresejūt: ilga.suplinska@rta.lv

Konfereņcis dorba volūdys: latgalīšu, latvīšu, angļu, krīvu. Ka referata prezentacejis volūda ir latgalīšu, latvīšu voi krīvu, organizatori prosa sagataveit elektronisku prezentaceju voi kūpsavylkumu angļu volūdā.

Izastuošonys garums: 30 minutys, īskaitūt diskuseju (10 min.).

Konfereņcis daleibys moksa: 40 EUR, studeņtim — 20 EUR.

Konfereņcis laikā nūtiks žurnala „Via Latgalica” (Nr. 9) i „Latgalistikys kongresu materialu” (Nr. 5) prezentaceja, taipat paradzāta tradicionaluo muzykali literaruo Andrejdīna i cytys kulturys nūtikšonys.