Karonhisake: “Cylvāki ir vyssmoguokuo narkotika”

LaKuGa 20. Juņs, 2017. gods 0
Karonhisake: “Cylvāki ir vyssmoguokuo narkotika”
Aiļu autore: Karonhisake

 

Sagrīz dvieseli divūs lelūs gobolūs

I paraugi,

Kurs gobols lobuok garšoj ar svīkstu.

Tik daudzi ļūbesteibys

I tik moz laika.

Dīvam žāļ, ka

Mes poši asam laika ruodeituoji

I tikšķam iz dīnvydu.

Latvejis leņteite ap rūku i – aidā!

Sīna kaudze pi jiurys

Bez gūvu,

Ar mani.

 

***

Mes asam tī, kur asom,

I ir tik labi

Byut.

Raksteišu, sasatiksim, apsūlu –

Bet dorba daudz, tok rūkys nadaīt.

I kū tu nu tuo daboj?

Cylvāki ir vyssmoguokuo narkotika.

I lomkys piec jim

Vysvaira suop rudiņūs.

Vysi trezveņniki/nadzāruoji

Reiz stīpsīs piec gluozis.

 

***

Kur palīk Zīmyssvātku duovonys?

Lidoj nazynomā vierzīnī

Ar vysim šmukajim vuordim i baņteitem.

Labi, ka satryudej.

Švakuok, ka palelynoj

Piļsātys izguoztuvis perimetru.

Mož dūsim cyts cytam pa zemis spaņam?

Tod kotram byus sovs kolns –

Kam piļs,

Kam kopu.

 

***

Syudeigā laikā lobu dīnu nav.

Bet – bez māslu

Nabyutu cylvākam, kū runuot,

Myusai, kur skrīt,

I buļbom, kur augt.

 

***

Kod vīnkuorši ir labi

I sevī i apleik,

Pi ūksta vysa pasaulis izpratne

Ar vysim sovim semantiskajim leiminim –

Elementari, Vatson:

Eists bomžs grib svīkstamaizi.

Eists cylvāks atdūs jam sovu.

 

***

Soki, kū gribi –

Dzeivuot piec grafika

Ir pa-rei-zi.

Vaicuojums tikai,

Deļkuo kaidam tys saucās grafiks,

A kaidam – ritms?

Attīksme i cyti prīceni.

Natyci?

Paraugi nūsvinēt Zīmyssvātkus

Juoņu dīnā!

 

***

Sevkurs pasauļa lohs ar videjū

Var pateņtēt koč bolūža māslus –

Inovacejis – thats good.

A latvīši

Turpynuos ceļt ap sevi hruščovkys,

Cikom zam zemis nabyus pādejuo babeņa,

Kas giva kaifu komunismā.

 

***

Kaids stuosts byutu akmiņam

Dzeda sātys pogolmā?

Tok jau par viesturi

Ar vysaidom romatiskom sopļom pa vydu.

Tik ni ar godskaitlim.

Ar kruosom nu īškys.

I varātu, klausūtīs kai zam dozys,

Īgrymt i spļaut viersā reitdīnys pīnuokumam.

Bet akmini narunoj.

 

***

Iz īlom šausmys leoparda zuobokūs.

Sātuos napuortraukti tyveibys akti ar tehniku.

Mežā…

A kas jū zyna,

Vysim tok akti

Ar tehniku.

Puspasauļam varātu nūceļt skalpu

I salikt vydā zeminis.

Tod nivīnam

Nasmyrdātu nu mutis.

 

***

Sīvīte ap treisdesmit

Iz vintage lisapeda.

Ar bizeitem,

Bez gradzyna,

Ar gruomotu.

Bejušuo klasisbīdrine

Ar napabeigtu videjū,

Div bārnim i realitatis šovim.

Intelekts sīvītei

Ir lobuokais kontracepcejis leidzeklis.

 

***

Tei gribiešona

Byut, cik var tyvu,

Just, cik var styprai,

I aizamierst

Ir pretrunā ar pasauli.

Nav tān vītys mīlesteibai.

I pat ka byutu –

Cikom meklej,

Deļ vysim jau esi mauka.

Nu i lai.

Moralis nav.

Tikai patīseibys spēle.

I mūdynuotuojs iz septeņu –

Reit iz dorbu.

 

***

Zyni, par kū vysi muokslinīki dzer?

Partū, ka dzerūt

Mes aizajamam prīcu

Nu nuokušuos dīnys –

Tys ir vīneigais poruods,

Kū reiz navajadzēs atmoksuot.

 

***

Kai raksteit,

Kod kotru dīnu

Īdvasmu pajam to Zīmyssvātki,

To Leldīne

Ar veikalim

I amatnīku prīšknasumim,

Kurūs cīši daudz sirds,

Bet cīši moz pruota.

Muna Latgola nūsiermoj.

I taipoš es.            

Navar cylvāks byut jauns,

Ka vīneigajam viļcīņam nu Reigys

Golapunkts ir Zylupe.