Ar pīktū sezonu atsagrīž raidejums “Cytaidi latviskais”

LaKuGa 27. Juņs, 2017. gods Comments Off on Ar pīktū sezonu atsagrīž raidejums “Cytaidi latviskais”

2. julī 18.20 LTV1 ar pīktū sezonu pi skateituoju atsagrīž pozitivūs stuostu cyklys “Cytaidi latviskais”, viestej informaceja Latvejis Televizejis sātys lopā.

Jaunuo sezona tiks suokta ar stuostu par Latgolys pūdnīku dinasteju – Ušpelim. Andris Ušpelis dzeivoj pavysam natuoli nu Rēzeknis, vītā, kurai ir naparosts i intrigejūšs nūsaukums – Pocelujevka. Itam nūsaukumam ir ari sova vīta Andra i juo sīvys, Eiropā zynomuos klavesinistis Īvys Salietis mīlys stuostā. Andris turpynoj tāva i dzeda aizsuoktū – vyrpoj vuoraunīkus i vāzis, žbanus i bļūdys, taisa škeivus i svečturus.

Itymā raidejumā tiks taiseits ari sviļpaunīks, kurū parosti taisa vysi, kurī pyrmū reizi tur rūkuos muolu. Byus stuosti par malnū i glazātū keramiku, apdadzynuošonys tehnologejom, tiks apsavārti vacmeistaru dorbi nu Andra kolekcejis.

Kab lobuok izprostu Ušpeļu dzymtys dažaidūs paaudžu keramiku rūkrokstus, raidejuma veiduotuoji pieteis Rakstnīceibys i muzykys muzeja keramikys kruojumu, kas apsaverams Raiņa muzejā Juosmuižā.

Andra i Īvys svineibu dīnā, sastajā kuozu jubilejā, jī kūpā ar draugim i folklorys kūpu “Dziga” muzicēs, pasadaleis atmiņuos, baudeis Latgolys i eksotiskūs zemu kulinarū montuojumu.

Raidejumu voda latgalīšu dzejnīks Valentins Lukaševičs, scenareja autoris: Sandra Freiberga, Zita Kaminska, operators Uvis Burjāns.

Komentari slāgti.