Izlasē “Sviests 7” īkļauta Kārļa Kazāka i “Ceidaru” dzīsme

LaKuGa 30. Juņs, 2017. gods Comments Off on Izlasē “Sviests 7” īkļauta Kārļa Kazāka i “Ceidaru” dzīsme

Naseņ dīnys gaismu īraudzejušajā etnomuzykys izlasē “Sviests 7” īkļauta folklorys kūpys “Ceidari” i dzīsminīka Kārļa Kazāka kūpeigi izpiļdeituo dzīsme “Zīmeņa”.

Folklorys kūpys “Ceidari” vadeituoja Marta Vaivode atkluoj, ka nabeja div dūmu – “Sviests 7” dzīsme juoīroksta kūpā ar Kārli Kazāku. Ari par pošu dzīsmi nabejs švuorbu, vysim bejs pošsaprūtamai, ka tei byus “Zīmeņa”. “Ceidarim” itei dzīsme ir eipaši meila, partū ka tei ir pyrmuo dzīsme, kurū vysi kūpā īsavuicejuši. 

Ceļš iz kūpeigu sasadzīduošonu ar Kārli suocēs caur īpasazeišonu projektā “Velomūzika” Viļānus, kas jau piec pusgoda eistynuojās ar pyrmū “Zīmeņa” dzīduošonys reizi Latgalīšu kulturys goda bolvā “Boņuks” iz Latgolys viestnīceibys GORS leluos skotivis. Folklorys kūpys sirsneiguo draudzeiba ar dzīsminīku Kārli Kazāku izapauduse i ar kūpeigu sasadzīduošonu, i latgaliskūs dzīšmu populariziešonu kai Latgolā, tai cytur Latvejā.

Dzīsme “Zīmeņa” ir nu Preiļu pusis teiciejis Domicellys Līpenis pyura.

Bīdreibys “Latgolys Studentu centrs“ folklorys kūpa “Ceidari“ dzymuse Reigā 2013. goda pavasarī, puļcejūt jaunus i aktivus ļauds ar latgaliskom saknem, kas, itūšaļt dzeivojūt golvyspiļsātā, sovai prīcai turpynoj latgaliskuos dzīduošonys tradicejis. Rūžupe, Bieržpiļs, Auleja, Bukmuiža, Škilbāni, Preili i cytys Latgolys vītys ir tuos, kurūs dzīsmis vysbīžuok izskaņ “Ceidaru“ repertuarā, tok tys vysod teik papyldynuots ar zynuošonom par cytu Latvejis vītu dzīsmem. 

Komentari slāgti.