“Pi myusim Latgolā” gastej Viļakys pusē pi Dzintara Dvinska

LaKuGa 6. Juļs, 2017. gods Comments Off on “Pi myusim Latgolā” gastej Viļakys pusē pi Dzintara Dvinska
“Pi myusim Latgolā” gastej Viļakys pusē pi Dzintara Dvinska

Itymā nedeļgolā Viļakys nūvodā Dzintars Dvinskis jau 11. reizi Zīmeļlatgolys retro rallijā puļcēs retro mocikletu cīneituojus. Kab dazynuotu vaira par vacajim spākrotim i īpazeitu pošu rallija organizatoru, Laura Sondore-Strode gasteja Viļakys pusē.

Dzintars stuosta, ka dūma par itaida mārūga pasuokumu, kas apvīnuotu retro mocikletu cīneituojus Latgolā, bejuse jau seņ. Pošā suokumā vaira tyka braukuots iz Reigu ci cytu Latvejis vītu. Agruok asūt bejs mozuok mocikletu, sovpus niu itei kusteiba atsateistejuse tik tuoli, ka gondreiž kotrā vosorys nedeļgolā nūteik pa kaidam pasuocīņam mocikletistim i retro mocikletu cīneituojim.

Kai jau kotru godu, ari itūgod rallijā izstruoduots maršruts, tai kab pošim mocikletistim byutu interesanti apsavērt Latgolys dobu, kai ari lai Zīmeļlatgolys dzeivuotuojim byutu vareiba apsavērt retro mocikletus. Tehnika byus apsaverama Vieršukolnā, Viļakā, Rekovā, Kuorsovā. Dzintars nūruoda, ka tei byus taida sovpateiga ekspediceja pa Austrumu rūbežu.

Paraleli dorbam sovā saimisteibā, Ceiruleišu saiminīks kapcej gali, atjaunoj saimisteibys kuormus, kolekcionej retro mocikletus i mopedus, kai ari vacus prīškmatus i dorbareikus. Dzintars ar aizrauteibu pietiejs sovys sādžys viesturi i izdevs ari gruomotu. Juo eipašumā patīsai ir īspaideiga senlītu kolekceja, kū apskaustu na viņ viesturnīki, nu ari muzeji.

Komentari slāgti.