Juļa beiguos svieteis “Annas Dagdā”

LaKuGa 11. Juļs, 2017. gods Comments Off on Juļa beiguos svieteis “Annas Dagdā”

Kai jau kotru godu, ari itūgod juļa pādejā nedeļgolā tiks svieteiti nūvoda svātki “Annas Dagdā”, informej Dagdys nūvoda pošvaļdeibys puorstuove Guna Malinovska.

 

BREINEIGUO JAUNEIBA

27. julī, catūrtdīnē, svātkus atkluos nūvoda jaunīši. Jī sasaceņss vysaiduokuos aktivitatēs, spēlēs, stafetēs i pīsadaleis veseleibu veicynojūšūs pasuokumūs. Jaunīšu sporta dīnā aicynuoti pīsadaleit jaunīši vacumā nu 13 da 18 godu komanduos pa 8 dalinīki.

VASALĀ MĪSĀ – VASALS GORS

28. julī jau 12 stuņdēs Dagdys azara pludmalē teik aicynuoti pludmalis volejbola spālātuoji. Īsastuojūt tymsai, basketbola cīneituoji varēs pīsadaleit voi atbaļsteit spālātuojus nakts strītbola turnirā JIC “Parka rozes”. Sovukuort Dagdys Tautys nomā nūtiks muokslys kinys “Sapnis” pyrmizruode Tuos režisors ir dagdīts Arturs Tomaševskis, kas itūšaļt dzeivoj Londonā, nu juo dūmys napuortraukti atsagrīž Dagdā, dzymtajuos vītuos.

MUNA VOLŪDA MUNĀ SĀTĀ

Jau nu agra sastdīnis reita piļsātys skverā nūtiks vysvysaidys aktivitatis i izklaidis. Tierdzeņā varēs īsaguoduot i vītejūs amatnīku i sātys ražuotuoju ražuojumus, i gostu darynuojumus. Jau nu 10 stuņžu sevkurs varēs īsasaisteit vysaidu prasmu školā i, īspiejams, izzynuot daudz kuo jauna. Eistam latgalīšam pateik labi paēst i bez dzīsmis – nikur. Ka apvīnoj obejis ituos latgalīša īzeimis, tod rūnās kulinarejis šovs ar folklorys elementim. Kas taišni tī nūtiks, kab palīk nūslāpums! Iz reizis piec šova laukumā pi dūmis nūtiks rūbežsardzis kinologu paraugdemonstriejumi.

Pušdiņlaikā Dagdys muižā nūtiks zyrgu rikšuotuoju saceņseibys – vīns nu vysvaira apmaklātuokajim pasuokumim, kas palics par nūvoda svātku naatjemamu sastuovdaļu.

20.00 Dagdys breivdobys estradē nūtiks konkursa “Dagdas novada ziedu dzīpari Latvijas villainē” laureatu apbolvuošona, kas meisīs ar jautrom i latgaliskom dejom. Jau 21.00 eistynu Latgolys garšu varēs izjust dzīšmu vokorā “Sajust Latgolu caur dzīsmi”. Iz skotivis kuops grupys “Dabasu Durovys” i “Piparmētra”, latgalīšu rokmuziki “Sovvaļnīks” i poetiskuo roka apvīneiba “Kapļi”. Turpynuojumā zaļumbalu spielēs Jurs Ostrovskis i “Dvinskas muzikanti”.

KŪPĀ ASOM SPĀKS

Svātdīne Latgolā suocās ar dīvkolpuojumu. 11 stuņdēs vysi byus gaideiti Beresnis Rūmys katuoļu bazneicā iz Sv. Annys dīnys atlaidom. 

13.00 sovu spāku Dagdys breivdobys estradē demonstrēs Latvejis spākaveiri. Ari vītejī dzeivuotuoji ir aicynuoti paruodeit sovu spāku i puorspēt paguojušuo goda ruodeituojus saceņseibuos “Latvijas spēcīgākā pilsēta”. Tīpat piecpušdīnē nūtiks putu bals pošim mozuokajim svātku apmaklātuojim.

Vysūs pasuokumūs īīšona ir bez moksys.

Komentari slāgti.