Arņs Slobožanins soloprojektu suoc ar dzīsmi “Tur”

LaKuGa 13. Juļs, 2017. gods 0

Latgalīšu grupai “Dabasu Durovys” niu ir rodūšuo pauze, i itū šaļti grupys solists Arņs Slobožanins izmontoj, kab realizātu sovu ideju par soloprojektu, pīduovojūt klauseituojim dzīsmi “Tur”.

Sovu muzykalū suonsūli autors skaidroj: “Kaidu reizi daīt laiks padareit dorbus, kas jau seņ ir padūmā, nu nav bejuse vareiba tim dasagiut. Tys ir taipat, kai sakuortuot vasarneicu, sataiseit trepis voi saškiruot garderobi.”

Muzykalī aizmetni dzīsmei “Tur” rodušīs pavasarī, nedeļgolu pavodūt Kuorsovys nūvoda Buozovā.

“Beja apreļa suokys. Pyrma puors dīnu nazkodejuo grupys menedžere Anna Briška mani beja īpazeistynuojuse ar basgitaristu Zurabi Ivanānu (Gruzeja), kurū uzaicynuoju gostūs da seve. Vyss nūtyka dabiski – Zurabi spēlēja kaidu nu sovim basgitarys rifim, kurū es “nūgivu” i radeju vuordus i meļdeņu. Dzīsme ir par vītu, kur tei sacarāta – Latvejis pīrūbeža cīmatu, kurā pavadeju sovu bierneibu, vītu, kura maņ vysod byus eipaša. Dūmoju, ka kotram nu myusu bierneibys zemei ir eipaša, sylta nūzeime, partū tycu, ka dzīsme spēs uzrunuot.”  

Dzīsme īraksteita tīpat Buozovā. Īrokstā pīsadaleja Arņs Slobožanins (gitara, bolss), Zurabi Ivanāns (basgitara, bolss, tausteni), Deniss Smirnovs (bungys). Miksēja Armands Treilihs. Videoverseju radejs Ivars Utināns (IVO productions).