19. julī pieški myužeibā aizguojuse latgalīšu muzike Aija Eriņa.

Aija Eriņa dzymuse 1985. goda 12. majā muzykalajā Eriņu saimē, auguse Rēzeknis nūvoda Drycānu pogostā. 

Eipašu atpazeistameibu Eriņu saime īmontuoja piec daleibys šovā “Dziedošās ģimenes” 2009. godā, kurā jī ījēme 3. vītu. Nu Aija kai soliste beja labi zynoma jau piec uzvarys šovā “Latvijas talants 2008”, kas jai deve vareibu ari papyldynuot vokalū meistareibu muzykys školā Londonā.

Piec dzīdūšūs saimu šova Eriņu saime aktivi koncertēja pa vysu Latveju, baudūt lelu cylvāku mīlesteibu, kū radeja ari lelais saimis spāks, kas beja jiutams jūs uzastuošonys reizēs. Atkuortuoti saime televizejis šovā “Dziedošās ģimenes” pīsadaleja ari 2013. godā. Nu vēļ pyrma tuo, 2013. goda pavasarī, Aija Eriņa Rēzeknis Zaļūs pakolnu kora sastuovā pīsadaleja šovā “Koru kari 3”, izceinejūt 1. vītu.

Aija muzicēja ari kai solomuokslineica, izpyldūt i sovys originalkompozicejis, i ari tāva dzīsminīka Andra Eriņa sacerātuos dzīsmis. Zynomuokuos Aijis Erinis izpiļdeituos dzīsmis beja “Vysa pyrma”, “Oki, nalej, leiteņ”, “Sakura”, “Trešā maija dziesmiņa” i cytys. 

2013. godā intervejā portalam TVNET Aija par sovu muziciešonu saceja: “Taidai nišai, kurā es grybātu dorbuotīs, Latvejā ir nalela auditoreja, partū ar tū varu nūsadorbuot tik hobeja leiminī. Sovai prīcai muziceju kūpā ar gora i dūmu bīdrim, palaikam īrokstu kaidu dzīsmi, tok maizeiti peļneju cytaiž.”

Paraleli muzykai Aija Eriņa, kas beja absolvējuse Reigys Stradeņa universitatis politikys zynuotnis studeju programu, struoduojuse ari žurnalistikys i sabīdryskūs attīceibu jūmā. Jei bejuse portalu diena.lv i lsm.lv kulturys ziņu redaktore, struoduojuse ari Latgolys viestnīceibā GORS.

Vīna nu pādejuom Aijis Erinis uzastuošonom beja Latgalīšu volūdys naktī majā suokumā Rēzeknē (uzastuošonys video). 

Vysdziļuokuo leidzjiuteiba Aijis Erinis tyvinīkim.