Saruna ar skriejieju Juoni Kolužu

LaKuGa 24. Juļs, 2017. gods Comments Off on Saruna ar skriejieju Juoni Kolužu

Pādejūs godu laikā cīši lelu pīkrisšonu izapeļnejuši vysaidi skrīšonys pasuokumi. Ari Latgolā ir gona daudzi skriejieju. Vīns nu taidu ir Juoņs Kolužs, kurs pīsadalejs pat pasauļa slavenajā Ņujorkys maratonā.

Juoņs Kolužs ir nu Daugovpiļs nūvoda Vyšku pogosta, bet dorba dīnuos dzeivoj i Daugovpilī. Jis struodoj par programmātuoju, i leluokuo dorba dīnys daļa jam paīt siežūt. Lai izavyngrynuotu i atsapyustu nu datora, jis suoce nūsadorbuot ar skrīšonu.

Kab dazynuotu vaira par Juoni i juo skriejīni nu Vyšku da Ņujorkai, ar skriejieju tykuos Jurs Kučinskis.

 

Cik ilgi tu nūsadarbuoj ar skrīšonu, i kas tevi pamudynuoja suokt?

Ar skrīšonu regulari nūsadarbuoju 4 godus. Pamudynuoja, var saceit, gribiešona sevi puorbaudeit i pīruodeit, ka es varu normali, mīreigi nūskrīt 5 kilometrus. Suoču ar taidu programu, kura saucās nu divana leidz 5 kilometrim. Tai tys vyss aizguoja – 5 kilometri, 10, pusmaratons i maratons.

Cik lelys distancis ir pusmaratonam i maratonam?

Maratons ir 42 kilometri, i , attīceigi, pusmaratons – 21 kilometri.

Voi esi raudzejs sovus spākus puorbaudeit ari, skrīnūt garuokus gobolus?

Divejis reizis asu pīsadalejs Latvejis čempionatā 50 kilometru skrīšonā, viņ partū ka jis nūtyka Daugovpiļī voi Daugovpiļs nūvodā.

Kleist baumys, ka tu esi bejs ari Ņujorkā i skriejs. Kai tu aizskrieji tik tuoli?

Baumys ir pareizys. Tys tai nadūmuojūt, naplanojūt, tai vīnkuorši ir saguojis. 2015. godā pīsadaleju Reigys maratonā i tī organizēja lotereju. Es beju vīns nu tūs laimeigūs, kuri sajēme bezmoksys garanteitu daleibu lelajā Ņujorkys maratonā. Tys ir vīns nu leluokūs, slovanuokūs i grandiozuokūs pasauļa maratonu.

Kai tev tī guoja?

Tys beja īspaideigi. Radzūt taidu pasuokumu, īspaidi palīk iz vysu dzeivi. Tī ir 50 tyukstūšys dalinīku. Tī ir 2 miljoni skateituoju īluos, tys zeimoj, ka napuortrauktai ir atbolsts, plakati, saucīni i spielej muzikanti. Tei ir naatkuortojama atmosfera. Tī ir piļsātys svātki. Vysim ir svātki! Par tū skrīšonu runojūt, varbyut nasaguoja tik uotri, kai grybātūs, bet, nu ūtrys pusis, tys ir labi, tai saguoja vairuok izbaudeit tū pošu trasi, tū atmosferu garuok.

Tu ari beji vīns nū tūs, kas īguļdeja sovu dorbu i laiku Daugovpiļs pusmaratona organiziešonā, pastuosti par tū.

Nui, tys tai beja. Ituo pusmaratona Daugovpiļs pūsma organizatori sasakontaktēja ar mani, i pīduovuoja pīsadaleit reklamys pasuokumūs, kab popularizeitu itū pasuokumu. Vīna nu aktivitašu, kur pīsadaleju i organizieju, beja tai saucamī kūptreneni, kod sasalasejom divys reizis nedeļā i kūpā treniejomēs, paskriejom pa piļsātu ci Strūpu mežu.

Kai nūtyka tī treneni? Cik lela beja atsauceiba?

Atsauceiba – kai kuru dīnu. Atkareigs nu laikapstuokļu. Atsauceiba varēja byut leluoka, bet deļ pyrmuos reizis, ruodīs, beja labi.

Pastuosti par personeigajim rekordim?

Tī rezultati ir tuoli nu amateru lobuokūs rezultatu, varātum saceit, ka asu pyrmajā trešdaļā taidūs leluokajūs pasuokumūs. Uotruokais maratons beja 3 stuņdis i 30 minotu.

Voi ir kaida nūteikta gataveišonuos pyrms skriejīņu?

Ir izstruoduotys dažaidys treneņu programys. Gatavejūtīs maratonam, es raugu īvāruot maratonu treniešonuos programu. Tī ir vairuok par tū, cik reižu nedeļā i cik ilgi skrīt, mozuok viereibys tī pīvieršu dažaidim vyngrynojumim ci taidom lītom.

Cik stuņžu tu pavodi trenejūtīs?

Treneņprogramys maksimums varātum byut kaidi 70 kilometri nedeļā, tuos ir kaidys 7 stuņdis nedeļā, varātum byut ari vaira.

Kaidys ir tuos sajiutys, asūt storp maratona dalinīku, kod apleik ir cīši daudz cylvāku? Voi nav tai, ka gribīs vysus pastumt molā?

Teišom taidūs lelūs pasuokumūs eipaši tū var izjust startā, kad vysi ir cīši sūpluok i, var saceit, saspīsti. Kod dūd starta šuovīni, tod ir tai, ka varbyut kaidu pusminotu tu navari nikur pasakustēt, partū ka tev vēļ prīškā nav suokuši skrīt. Bet tys pakuopeniski izaratynoj, i tod ir normali. Tymūs pasuokumūs, kur ir daudz dalinīku, ir interesanti partū, ka vysod ir kaidi dalinīki, kuri skrīn tovā tempā, tod ir ar kū sasaceņst. Kod ir mozuok dalinīku, tod tys vyss tai izaratynoj stuņžu laikā, palīk mozuok dalinīku tovā tempā. Tod var nabyut tik interesanti.

Tev ir kaidi nuokūtnis plani saisteibā ar skrīšonu?

Pagaidom nav planu vysu tū mest molā. Juoturpynoj! Raugu skrīt 2 maratonus godā. Vīnu tepat Latvejā i vīnu uorzemēs. Turpynuošu sasadaleit i īspieju rūbežuos uzlobuot sovus rezultatus.

Cik tod valstīs tu vēļ esi paspiejs paskraideit?

Asu bejs Lītovā (Viļņā), Ņujorkā i Porto piļsātā Portugālē.

Ar kū atsašķir maratoni Viļņā, Portugalē ci Ņujorkā?

Portugalē, pīmāram, starts i finišs ir okeana krostā. Skrīšona tī ir pa upis īleju, cīši šmuki. Dalinīku tī beja cīši daudz, saleidzynojūt ar Lītovu. Bet Ņujorka stuov vysam tam puori. Tei ir piļneigi cyta maratonu kategoreja.

Kū tu īsaceitu tim, kuri planavoj suokt skrīt?

Īsuociejim nūteikti varātum īsaceit napuorspeilēt ar pošu suokumu. Īsuociejim vajag vysu dareit pakuopeniski, ni vaira par 3 reizem nedeļā, napuorspeilejūt ar distaņcis garumu. Navajag skrīt uotri, golvonais ir dareit vysu regulari i pakuopeniski. Piec kaida laika vyss process paliks vīgļuoks i vīgļuoks i pasaruodeis vīnkuorši prīca, ka tu vari normalā tempā skrīt.

Paļdis par sarunu! Lai izadūd pīveikt vystuoluokuos distaņcis!

          

Komentari slāgti.