19. augustā nu 10.00 da 19.00 Jākuba laukumā nūtiks Latgolys dīna Reigā.

Latgolys dīna Reigā jau palykuse par tradiceju. Itūgod tei nūtiks jau catūrtū reizi i trešū godu taišni Jākuba laukumā.

Vysi Latgolys dīnys gosti varēs īsapazeit ar ceļojūšuo tierga dalinīkim i Latgolys tematiskajim cīmim: Vyšku amatnīku cīmu, Nuokūtnis ūzulu cīmu, Kotleru veina cīmu, Tierga cīmu, Gūda saimineicu cīmu, Turku pierts cīmu, Leiksnys muižys parka cīmu, Radūšūs prasmu cīmu, Muzykantu cīmu. Dorbuosīs radūšuos darbneicys sviļpaunīku taiseišonā, klugu peišonā, muzykys instrumentu taiseišonā, senejūs zeimu, smuorda kūceņu, kļova lopu rūzeišu taiseišonā.

Taipat pasuokumā varēs redzēt i dzierdēt kūklis spēli i paraudzēt tū pošim folklorys kūpys “Sudobri” vadeituojis Aijis Smirnovys vadeibā, apsavērt studejis “Dzīpariņš” nu Rēzeknis i cytu nūvoda amatnīku paraugdemonstriejumus. Varēs izmieginuot veiksmi dreizajūs latgalīšu volūdys kursūs i nūpeļneit kaidu bolvu, kai ari īsapazeit ar ceļuošonys vareibom pa vysu Latgolu.

Vysys dīnys garumā varēs īsaguoduot omota meistaru izstruoduojumus, sātys ražuotuoju gordumus, Latgolys laukūs izaudzātuos veļtis, nūgaršuot sātā captu maizi, sātys sīru, svaigi spīstys sulys, sātys kvasu, eistu latgalīšu mīsteņu, putru nu saimis kotla.

Apmaklātuojus prīcynuos ari folklorys kūpa “Ceiruleits” ar sovim doncuotuojim i dzīduotuojim nu Leivuona nūvoda i muzykanti nu cytu Latgolys molu, kai ari vokali instrumentaluo grupa “Miggla” nu Aglyunys nūvoda. Pasuokuma nūslāguma daļā paradzāta jau tradicionaluo sasadzīduošona ar muzykantim.

Latgolys dīnu Reigā reikoj Latgolys planavuošonys regions sadarbeibā ar bīdreibu “Latgales tematiskie ciemi”.