Reigys Porcelana muzejā apsaverama Eleonorys Pastaris personalizstuode

LaKuGa 10. Augusts, 2017. gods 0
Reigys Porcelana muzejā apsaverama Eleonorys Pastaris personalizstuode

Da 10. oktobra Reigys Porcelana muzejā apsaverama keramikis Eleonorys Pastaris izstuode “Meditācijas”, viestej informaceja muzeja sātyslopā.

Kab savaļdeitu sarežgeituokū keramikys materialu porcelanu, ir vajadzeigs meditativs spāks i piļneiga materiala kontrole. Eleonora Pastare ir struoduojuse ar muolu, šamotu i cytim keramikys materialim, nu pādejā laikā dasavārsuse taišni porcelanam. Sovūs jaunuokajūs dorbūs muokslineica paruoda sīviškeiguma i spāka manifestaceju, rodūt trauslus, gaiseigus i apburūšus porcelana dorbus.

Eleonora Pastare (1954) dzymuse Daugovpilī, dzeivoj i struodoj Leivuonā. Piec Rēzeknis lītiškuos muokslys školys keramikys nūdalis absolviešonys (1974), Daugovpiļs Universitatis Muokslys katedrā sajāmuse bakalaura grādu pedagogejā i magistra grādu muokslā (2007). Muokslineica pīsadola izstuodēs i cytūs muokslys projektūs Latvejā i uorvaļstīs nu 1977. goda. Eloenorai Pastarei ir vaira nakai divdesmit godu ilga pīredze pedagogiskajā dorbā keramikys specialitatē.

Karteņā: Eleonorys Pastaris dorbi nu serejis “Meditācijas”. Kartenis autore: Baiba Priedīte