“Pi myusim Latgolā” saruna ar Juri Želvi

LaKuGa 28. Augusts, 2017. gods Comments Off on “Pi myusim Latgolā” saruna ar Juri Želvi

Septembrī paīs pyrmuos 100 dīnys, kai dorbu suoce piļsātu i nūvodu pošvaļdeibu jaunī deputatu sasaukumi. Latgolā ir pošvaļdeibys, kuruos nūteikūšuos puormainis izskaņ pat Latvejis mārūgā. Ir ari pošvaļdeibys, kuruos mīregai turpynoj aizsuoktū atteisteibys kursu, par pīvadumu, Preiļu nūvoda pošvaļdeiba, kur gasteja ari raidejuma “Pi myusim Latgolā” veiduotuoji.

Jurs Želvis omotu Lauku atbolsta dīnastā puormejs pret Preiļu nūvoda pošvaļdeibys prīšksādātuojis vītnīka krāslu. Pats Jurs par omota maiņu soka, ka kolegi nu LAD palaiduši jū ar suopi sirdī.

“Es pīļaunu, ka kotra cylvēka dzeivē daīt taids moments, kod vāga pakuopt pa karjerys kuopnem i pasavērt augšuok. Cylvāks naatsateista viņ siežūt iz vītys,” par puormaiņom sovā dzeivē soka Jurs Želvis.

Dorbs pošvaļdeibā Juram Želvim nav svešs. Jis nūruoda, ka juo leluokais pluss ir tys, ka, īīmūt mozajā politikā, jau zynuoja, ar kū pošvaļdeiba nūsadorboj. Jurs pastreipoj, ka niu palics tik īsadzilinuot i izprast rysynojamuos problemys i struoduot tuoļuok.

Izaruod, ka Jurs ir vīns nu godūs jaunuokajim Preiļu nūvoda pošvaļdeibys deputatim. Tys paruoda, ka Preiļu nūvoda dzeivuotuoji ir gotovi uzaticēt ari jaunim cylvākim.

Na viņ dorbs pošvaļdeibā, nu ari muzyka Juram Želvim nav sveša. Jis sovulaik bejs vīns nu grupys “Likteneigais pagrīzīņs iz Vainovu” dalinīkim, kas radejuši i īdzīduojuši jau tautā labi zynomū dzīsmi par Opeli.

Komentari slāgti.