24. septembrī 16.00 Ludzys Tautys nomā varēs izjust eistynu latgalīšu goru režisora Olega Šapošnikova īstudātajā šokejūšā komedejā “Latgaliešu rulete”, informej Daugovpiļs teatra puorstuove Janīna Ivanova.

Izruode “Latgaliešu rulete” ir komedeja latgaliski, kurā natryukst ni ospruoteibu, ni nagaideitu paviersīņu. Līpeņu saimei liktiņs pīspieliejs laimeigū loterejis beletu. Kai jau kuorteigim cylvākim pīsanuok, teik uzaicynuoti tyvuokī draugi i itei nūtikšona teik nūsvieteita. Bet nuokušajā reitā Līpeni atkluoj, ka loterejis belets ir izgaiss! Golvonī varūni naspiej rast sev vītu, raugūt saprast, kur tei ir palykuse. Vaineigais var byut sevkurs: i prīkšnīks, i kaids nu draugu, varbyut nalabvieleigs horoskops? Voi pat NLO! Patīseibys mekliejumūs Līpeni ir gotovi likt lītā vysus īspiejamūs īrūčus, kas vaiņugojās ar puorprotumim boguotu nūtikšonu vērtini.

Īstudiejums “Latgaliešu rulete” veiduots piec V. Sigareva lugys “Krievu loto” motivu, kurs, koč i nav vīns nu rakstureiguokajim dramaturga dorbim, nu tymā nūteikti jiutama Sigareva dorbim īrostuo, aiz satirys i komiskuo pleivura nūglobuotuo dzeivis patīseiba. Sovūs dorbūs V. Sigarevs pīsavierš parostu cylvāku dzeivei, kas ir vīns nu īmaslu, parkū juo dorbi spiej uzrunuot tik lelu sabīdreibys lūku.

Beletus var īsaguoduot Ludzys Tautys noma kasē (beletu cena: 3.50 – 5.50 eiro).