Latgolys Kulturviesturis muzejā apsaverama Aivara Kisis gleznu izstuode

LaKuGa 30. Augusts, 2017. gods Comments Off on Latgolys Kulturviesturis muzejā apsaverama Aivara Kisis gleznu izstuode

Da 30. septembra Latgolys Kulturviesturis muzejā (3. stuova vestibilā, Atbreivuošonys alejā 102, Rēzeknē) apsaverama Aivara Kisis gleznu izstuode “Starp debesīm un zemi”, informej muzeja Muokslys nūdalis vadeituoja Inese Dundure.

Pyrma pīcu godu Aivars Kise muzejā svieteja sovu 60. dzeivis jubileju ar gleznu izstuodi “Pārdomu vējš”, kurā gleznu autors īvede skateituoju fantazejis tālu pasaulī. Itūreiz izstuodē “Starp debesīm un zemi” apmaklātuoji var īsavērt i Aivara Kisis radeitajūs Latgolys ainovu atspulgūs, i autora filozofiskūs puordūmu izraiseitajūs motivūs. Pavasara i vosorys zaļums, maineigī dabesi, stidzenis i lauku celi, kas bīži viņ aizvad iz kaidu bazneicu. Kaidā ceļa pagrīzīnī skotam atsakluoj naleluo Piļcinis bazneica, kū muokslinīks nūgivs kai saulainu styureiti, kur vīgli i pruotam, i sirdei. Meža klusums bezviejā, upis mūsšonuos nu reita voi pīmierkušuo pīniņu pļova – kotrai ainovai ir sova nūskaņa.

Ar plakatisku pīeju radeituo glezna “Starp debesīm un zemi” aicynoj skateituoju īsadzilinuot planetys Zeme globalajuos problemuos, nu dorbs “Radīšana” – vaicuot atbiļdis iz eksistencialim vaicuojumim. Dzeivisprīcys pylnys ir autora gleznys, kas veļteitys draugim voi bārnim. Mozuo meitine, īskauta jai nūzeimeigu lītu i tālu pasaulī, verās skateituojam preteimā, atguodynojūt par poša bierneibā izsapynuotū. Autors atguodynoj, ka dzeivis celi i tymūs pīradzātais kotram ir tik dažaids. Cylvāks iz nailgu šaļti ir tics storp dabasim i zemi, izdzeivojūt sev lamtū. Aivars Kise naļaun dzeivis gryuteibom jimt viersrūku – gleznys tūp i dorbs dūd spāku i dzeivisprīcu.

Komentari slāgti.