Latvejis Centralajai padūmei veļteitā pasuokumā runuos par veiskupa Rancāna personeibys nūzeimi

LaKuGa 5. Septembris, 2017. gods Comments Off on Latvejis Centralajai padūmei veļteitā pasuokumā runuos par veiskupa Rancāna personeibys nūzeimi

8. septembrī 17.00 Reigā Sv. Marejis Magdalenys bazneicys pogolmā Mozajā Piļs īlā 2 nūtiks Latvejis viesturei i šudiņdīnai veļteits pasuokums “Latvijas Centrālās padomes 8. septembra deklarācija – ar skatu uz Latvijas simtgadi”, kurā runuos ari par veiskupa Jezupa Rancāna personeibys nūzeimi.

1944. goda 8. septembrī nacistu okupacejis apstuokļūs nacionaluos pretuošonuos organizacejis Latvejis Centraluos padūmis (LCP) vodūšī darbinīki pījēme Deklaraceju par Latvejis vaļsts atjaunuošonu. Pasuokuma mierkis ir atguodynuot par itū nūzeimeigū faktu ceiņā par Latvejis vaļsts naatkareibys atjaunuošonu.

Pasuokuma nūtikšonys vīta nav najauša. Viesturis olūti nūruoda, ka 8. septembra Deklaraceja tyka paraksteita LCP dalinīka, Saeimys deputata i prīšksādātuoja bīdra veiskupa Jezupa Rancāna dzeivūklī Reigā, Mozajā piļs īlā 2 – kuormā, kas atsarūn sūpluok Sv. Marejis Magdalenys bazneicys pogolmam.

Vysi interesenti ir laipni aicynuoti pīsadaleit pasuokumā. Klauseituojus uzrunuos Latvejis Republikys Saeimys prīšksādātuoja Ināra Mūrniece, Latvejis Kara muzeja viesturneica, LCP viesturis pietneica Īva Kvāle, Vaļsts prezidenta konstitucionalūs tīseibu padūmnīks Dr. iur. Juoņs Pleps, kulturys sociologe Dr. sc.soc. Dagmāra Beitnere – Le Galla i prīsters Andris Kravalis. Tiks nūlaseita ari Luganys Teologejis fakultatis Šveicē profesora prīstera Andra Marejis Jerumaņa uzruna par Jezupa Rancāna personeibys nūzeimi. Runuotuoji snēgs īskotu LCP 8. septembra deklaracejis nūzeimē Latvejis vaļstiskuma viesturē i runuos par patriotisma, demokratejis i pylsūniskuos atbiļdeibys vierteibu nūzeimi Latvejis aktualūs nūtikšonu kontekstā. Pasuokumu muzykali kuplynuos dzīduotuojs Jurs Vizbulis i pianiste Ilze Fomina.

Pasuokumu reikoj Latvejis Centraluos padūmis pīminis fonds sadarbeibā ar Sv. Marejis Magdalenys Rūmys katuoļu draudzi. 19.00 Sv. Marejis Magdalenys bazneicā nūtiks LCP dalinīku pīmiņai veļteits dīvkolpuojums, kurā sevkurs ir aicynuots pīsadaleit.

Komentari slāgti.