Teik planavuots Fraņča Trasuna vuordā nūsaukt īlu Reigā

Teik planavuots Fraņča Trasuna vuordā nūsaukt īlu Reigā

Reigys dūmis Piļsātys atteisteibys komiteja pyrmūdiņ atbaļsteja jaunu nūsaukumu pīškieršonu deveņom golvyspiļsātys īlom voi tūs pūsmim, tymā skaitā ari īlai Fraņča Trasuna vuordā. Galeigais lāmums vēļ byus juopījam dūmis sēdē.

Piec Latgalīšu kulturys bīdreibys i cytu Latgolys navaļstiskūs organizaceju īrūsynuojuma nūlamts Reigys Latgolys prīškpiļsātā Kengaraga īlys pūsmu nu Austuvis īlys da Moskovys īlys puorsaukt par Fraņča Trasuna īlu.

Fraņcs Trasuns dzims 1864. goda 16. oktobrī i bejs īvarojams latgalīšu i latvīšu kulturys i gareigais darbinīks, vaļstsveirs i literats. Vysu myužu nūsadorbuojs ar latgalīšu volūdys i kulturys aizstuoveibu. “Fraņcs Trasuns īlyka myusu Latvejis gierbūnī trešū zvaigzni – Latgolu,” paglobojūt Trasunu saceja Vaļsts prezidents Juoņs Čakste.