Sastdiņ, 2. septembrī, Daugovpiļs dūmis uorkuortys sēdē deputati lēme par dūmis prīšksādātuoja Andreja Elksniņa atbreivuošonu nu omota. Niu dūmis prīšksādātuoja omotā īvālāts Rihards Eigims, kurs īprīkš piļdeja dūmis prīšksādātuoja pyrmuo vītnīka pīnuokumus. Raidejumā “Pi myusim Latgolā” Tenis Bikovskis rauga dazynuot vaira par rodušūs situaceju i apstuoklim.

Andrejs Elksniņš sovus atbaļsteituojus uzrunuoja socialajūs teiklūs, kai ari aicynuoja atbaļsteit jū dūmis uorkuortys sēdē. Sovpus Rihards Eigins kūpā ar kolegim nu sovys partejis beja vīnuojīs ar bejušū piļsātys golvu par kūpeigys koalicejis veiduošonu.

Andrejs Elksniņš vairuokkuort pastreipuojs, ka iz Daugovpili atguojs, kab ceineitūs pret vacū varu. Tok juodazeimoj, ka ari vacuos varys puorstuovi, par pīvadumu, Rihards Eigims i Juoņs Lāčplēsis, beja izapeļnejuši gona lelu vālātuoju atbolstu.

Rihards Eigims sarunā nūruoda, ka ir gotovs struoduot piļsātnīku lobā i sasadorbuot ar vysim dūmis deputatim. Ari bejušais dūmis vadeituojs Juoņs Lāčplēsis nūruoda, ka juo attīksme pret dorbu pošvaļdeibā nav mainejusēs. Taipoš jis soka, ka juoatstuoj aiz mugorys personeigī aizvainuojumi i juostruodoj.

Sovu komentaru par politiskū situaceju Daugovpilī snēdze ari politoligs Filips Rajevskis.