Preiļūs izstuodeitys gleznys nu Igora Pliča privatkolekcejis

LaKuGa 13. Septembris, 2017. gods 0

Vysu septembri Preiļūs, gostu sātā “Pie Pliča” apsaverama gleznu izstuode, kurā eksponāti dorbi nu Igora Pliča privatkolekcejis. Jis tū nūsaucs par unikalu gleznu izstuodi, partū ka tuos da šam nikod vēļ nav bejušys izstuodeitys. Izstuodis atkluošona jau reit, 14. septembrī 17.00.

Izstuodē pamatā eksponāti Aglyunys pusis muokslinīku dorbi. Daudzi autori nav muokslys profesionali, dreižuok saucami par naivistim. Nu, kai soka pats Igors Pličs, nanūlīdzami talanteigi. Kluotyn tim apsaverami ari vairuoku klasiķu dorbi.

Izstuodē apsaverami Aleksandra Selicka, Ontona Geriņa, Juoņa Plivdys, Nikolaja Kovaļeva, Vitālija Kalvāna, Paula Šprenka, Stanislava Gžibovska, Kazimira Lukaševiča, Voldemāra Kokoreviča, Imanta Ūzuleņa (Ozoliņa), Harija Veldris, Otto Pladera i cytu autoru dorbi.

Igors Pličs, kurs lobuok zynoms kai fotomuokslinīks, stuosta, ka muokslys dorbus nu sovys privatkolekcejis pīduovuot publiskai apsavieršonai jū pamudynuojs cytys muokslai veļteitys nūtikšonys, kas itymā mienesī nūteik Preiļūs – J. Pīguožņa bolvys Latvejis ainovu gleznīceibā padūšona, tai veļteituo izstuode i pleners. Daļai dorbu nav zynomi autori, lai ari iz gleznys ir tūs paroksti. Pličs cer iz muokslys zynuotnīku paleidzeibu itūs meikļu atrysynuošonā.

Lai ari izstuodē apsaverams lels skaits gleznu, tok vysu sovu kolekceju Igors Pličs naspiej izruodeit īrūbežuotūs telpu dieļ. Tok gribīs lai muokslys dorbus nūviertej ari cyti. “Cik tod var turēt sveci zem pyura!” soka Pličs.