Rēzeknis Tautys teatris aicynoj iz izruodi “Pupas” jaunā formatā

LaKuGa 15. Septembris, 2017. gods Comments Off on Rēzeknis Tautys teatris aicynoj iz izruodi “Pupas” jaunā formatā

19. septembrī 18.30 Rēzeknis Tautys teatris aicynoj iz komedeju “Pupas” Rēzeknis kulturys nomā jaunā ustobys formatā, informej Rēzeknis Kulturys i turisma centra puorstuove Maija Upeniece. Izruode maineita, kab tū varātu aizvest i paruodeit ari skateituojim Lītovā, 13. storptautyskajā teatra forumā “AIDAS 2017” Jonavā.

Lītaunīku autoris Daivys Čepauskaitis lugys “Pupas” pyrmizruode nūtyka 2016. goda 4. majā, nu itūšaļt tei ir atjaunuota jaunā – ustobys – formatā. Tys nūzeimoj, ka smīkli byus skaļuoki i jusšona leidza stypruoka, partū ka i izruodis varūni, i skateituoji byus cyts cytam sūpluok iz skotuvis. Ustobys izruodis formats ļaun skateituojim byut Alfona i Brigitys sābrim, rodim i gostim. Rēzeknis Tautys teatris ar atjaunuotū izruodi ustobys formatā 23. septembrī pīsadaleis 13. storptautyskajā teatra forumā “AIDAS 2017” Jonavā, Lītovā.

Vitalī dialogi suleigā latgalīšu volūdā ļaus pasasmīt par kasdīnys nasaskaņom i spuoruošonūs, kai ari puordūmuot – kas nūtur cylvākus kūpā myuža garumā – pīrodums voi mīlesteiba? Jei – mārga, līga kai spaļveņa, kura par sovu taisneibu i spiej ari ībeļzt tai, ka trums palīk. Jis – zynoms cīma smiejiejs, izgudruotuojs, kurs guodoj i ryupejās par sovu saimi i sātu. Tai ir bejs pyrma daudzu godu. Šudiņ jī ir vīns kaškeigs puors, kam juopavoda vairuokys stuņdis, īspīstim lifta kabinē. Apstuokli, kod pādejuo stuņdeite ruodīs asam kluotyn, līk Alfonam i Brigitai ceļt gaismā senejus nūslāpumus i izsaceit atsazeišonys – i smīkleigys, i skumeigys – raibys kai cylvāka myužs, kai pupys zīds.

Lūmuos: Dzintra Vernere i Kaspars Balodis.

Režisore: Muora Zaļaiskalns. 

Telpa i kostimi: Ināra Apele.

Gaisma i skaņa: Ints Salmiņš.

Nu lītaunīku volūdys tulkuojuse: Muora Mortuzāne-Muravska.

Beletus (3 i 2 eiro) var īsaguoduot Rēzeknis KN kasē, t. 64622066.

Īteicamais vacums: 7+

Foto: Anna Kuzmina

Komentari slāgti.