Latvejis Radejā skanēs pīci stuosti par “Latgolys Muorys” pīminekli

Portals lakuga.lv 18. Septembris, 2017. gods Comments Off on Latvejis Radejā skanēs pīci stuosti par “Latgolys Muorys” pīminekli

Nu šudiņdīnys pīcu dīnu garumā Latvejis Radejis pyrmajā programā skanēs pīminekļam “Vienoti Latvijai” aba “Latgolys Muorai” veļteita rubrika.

Latgolys atbreivuošonys pīminekli “Vienoti Latvijai” tauta īsaukuse par “Latgolys Muoru”, tys klivs na tikai par Rēzeknis, nu ari vysys Latgolys simbolu. Sovulaik tys atkluots vysai Eiropai sarežgeitā i trauksmainā laikā, viņ dažys dīnus piec Ūtruo pasauļa kara suokuma. Padūmju okupacejis varai tys beja traucejūšs, par tū pīminekli demontēje. Latgolā nūsastyprynojūt Nacistiskuos Vuocejis armejai, tū atjaunuoje. Pīminekli atkuortuoti nūguoze pieckara godūs, i sovā vītā “Latgolys Muora” atsagrīze viņ 1992. godā.

“Nu pat paguojušs 25 godi kai pīmineklis atjaunuots. Lai ari tys ir vīns nu Rēzeknis zynuomuokajim objektim, i laika gaitā ari nadaudz mitologizāts, na vysi zyna, kam par gūdu tys pastateits. Veidojūt stuostu sereju, gribim atguodynuot pīminekļa viesturi, i izceļt da šam mozuok zynomys detalis. Kai pīmāram, deļ kam iz tuo atkluošonu 1939. godā naīsaroda autoritaruo režima vadūņs Kārlis Ulmani, kaidi zaboboni par pīminekli beja izaplatejušs tautā i cytys,” stuosta rubrikys veiduotuoja, viesturneica Vineta Vilcāne.

Rubriku “Stāsts par Latgales Māru” veidoj Latvejis Radejis Latgolys studeja. Ēterā stuosti skanēs leidz 22. septembram plkst. 7:50 LR 1, tūs varēs skaiteit ari portalā lsm.lv.

Pyrmū stuostu par pīminekļa “Vienoti Latvijai” aba “Latgolys Muoru” tapšonys pyrmsuokumim var nūsaklauseit ite.

Komentari slāgti.