Izdūta dzīduotuojis Aijis Rimšys dzīšmu klade

LaKuGa 20. Septembris, 2017. gods Comments Off on Izdūta dzīduotuojis Aijis Rimšys dzīšmu klade

25. septembrī dzīduotuojai Aijai Rimšai (1967 – 2005) byutu tik 50… Koč i paguojuši 12 godi, kai Aija atsadus Dīva duorzūs, Aijis dzīsmis ir tikpat īmīļuotys i popularys kai tūreiz, kod tuos roduos, kod skanēja pošys Aijis dzīduotys, kod izguoja kasetis, kod tyka reikuoti naskaitami koncerti i bali. Aijis atcerei Latgolys entuziastu grupa “Biļdis” izdavuse gruomotu “Aijas Rimšas dziesmu klade”.

Aijis dzīšmu klade ir lykumsakareigs īprīkšejuo projekta – dokumentaluos kinys par Aiju Rimšu “Īsamirdzi zvaigznem leidza” (2015) – turpynuojums. Piec kinys izveidis i vaira par 60 izruodeišonys reizem vysā Latvejā beja puorlīceiba, ka juorealizej ideja par Aijis autordzīšmu tekstu izdūšonu gruomotā. Aijis autordzīšmu klade ir kai Aijis dzīšmu tekstu apkūpuojums – kab varātu dzīduot leidza, skaiteit, īsadzilinuot Aijis tekstūs kai literarūs dorbūs. Aijis dzīšmu kladē īkļautys dzīsmis nu vysu septeņu autordzīšmu albumu tū izdūšonys seceibā, albumūs naīkļautuos dzīsmis, kuruos īraksteitys studejā, popularys i skaņ radejā; tuos, kurūs meļdeni dzierdāti Aijis balūs, kaidā videofragmentā nūsaveramys i partū nepagaisynuotys; taidys, kurūs teksti palykuši kai uzmatumi iz lapeņu, receptu ūtrā pusē, nu kurūs meļdeņus zynuoja i pajēme leidza tik Aija… 

Informaceju sagataveja: Ineta Atpile-Jugane, projekta idejis autore

Komentari slāgti.